Nunarput tamakkerlugu 4G-mik maanna attaveqalerpoq
- Nunaqarfinni kingullersaalluni attaveqalersoq tassaavoq Qeqertaq, taakku ippassaq pingasunngornermi 4G-qalerput,
Telepost Greenland A/S-imi Teknikkimut IT-mullu qullersaq Jonas Hasselriis taama oqarpoq.
Taamaalilluni 2500 kilometerisut isorartutigisoq kiisalu kangia ilanngullugu 4G-mik mobilinut attaveqalerpoq.
AAMMA ATUARUK TELE-POST Nunatsinni 4G-mut attaveqaammik siullermik neqerooruteqarpoq
- Tamanna isumaqarpoq atuisugut pitsaalluinnartumik 4G-mik mobilitigut attaveqalersut. Illoqarfinni minnerunngitsumillu nunaqarfinni neqeroorutigisinnaasagut aamma pitsaanerulersissinnaalerpagut.
Nunatsinni sumiiffinni assigiinngitsuni 119-ini mobilinut antennet qaammatit arfinilissaat avillugu taarsersorneqarput. Taama sukkatigisumik taarsersorneqarsinnaanneri, Tele-Post-ip tupaallaatigaa. Upernavimmi sapaatip akunnerisa marluk matuma siorna attaviup nutaap atuutsileqqaarnera Jonas Hasselriisip najuuffigaa.
AAMMA ATUARUK 4G-mik attaveqaat TELE-POST-ip ukioq naatinnagu atuutilersissavaa
- Radiokædep attavininnissaa unnukkut utaqqivarput. Attavik arriitsorujussuarmiit attavik pitsaalluinnartoq Upernavimmi attavissaaleriasaarpoq. Soorlumi sekundtimut 80 megabit mobilinni angullugu eqqaamagiga. Tulluusimaarnaqaaq, Telepost Greenland A/S-imi teknikkimut IT-mullu qullersaq Jonas Hasselriis KNR-imut taama oqarpoq.
Ittoqqortoormiit, Tasiilaq Qaanaarlu taakkulu nunaqarfiini attaviit 4G qaammataasatigoortut ingerlaanassasoq, Upernavilli qaammataasatigoortumik attaveqarunnaarnerata kingorna attavik pitsaanerulissasoq oqaatigineqarpoq. Aaqqiissutissamilli suli Tele Post suliaqartoq aamma oqaatigineqarpoq.