TELE-POST Nunatsinni 4G-mut attaveqaammik siullermik neqerooruteqarpoq
Ullormimi tassani TELE-POST-ip saqqummiutissavaa 4G-mut teknologii nutaaq atorlugu mobilt bredbåndimi nioqqut nutaaq sukkasoorlu. Nioqqut nutaaq taaguutilik: Mobilt Bredbånd Premium, qaammammut attaveqaammi ilanngussalik 20 GB-inik 20/5 Mbit/s-it angullugit sukkassusilinnik. Atuisunngorfiusinnaanermut sukkaqisumut tassunga qaammammut aki tassaavoq 999 kroner.
- 4G-mut Nuummi attaveqaateqalernissaa ilungersorluta sulissutigaarput, taamaalilluta qulakkeerumallugu atuisutta suli sukkanerusumik minnerunngitsumillu pitsaanerusumik atuisinnaanerat angallanneqarsinnaasuminngaanniit interneternerminni, soorlu qarasaasiamiit imaluunniit tablet-iminngaanniit, telemut pisortaq Anders Barslund oqarpoq.
Mobiltelefonit 4G-p attaveqaataatigut nutaakkut aallaqqaataani atorsinnaassanngillat. Mobiltelefoninimmi pilersuisorisat ammaasseqqaartussaapput telefoniutimik attaveqaammik nutaamik atorsinnaalernissaannut, TELE-POST-illu maanna sulissutigaa isumaqatiginninniutit kingulliit naammassineqarnissaat.
- 2014-ip ingerlanerani mobiltelefonimik mobilt bredbåndimillu atuinerit allat 4G-p attaveqaataanut nuussavagut. Atuisut telefonertik atorlugu internetimi alakkartererujoornerminni pitsaanerusumik atugassaqartinneqarnerat tamatuma kingunerissavaa, Anders Barslund oqarpoq.
Mobilt Bredbånd Premium siullermik Nuummiinnaq atorneqarsinnaassaaq, atuisulli mobile internetimik sukkasuumik taassuminnga nunatsinni illoqarfinnut nunaqarfinnullu tamanut nassarsinnaanngornissaat TELE-POST-ip sulissutigaa, tassalu taakkunani sukkassuseq assigiinngittassaaq apeqqutaaluni 4G-mut, 3G-mut imaluunniit 2G-mut attaveqaateqarnersoq.
TELE-POST-ip 4G-mik teknologii sukkanerusumik sukkassusilik 2014-imi nunatsinni sumiiffinni arlalinni atorsinnaanngortissavaa, atuisut suli amerlanerit internetersinnaaqqullugit sukkanerusumik pitsaanerusumillu – taamaalillunilu TELE-POST peqataassaaq internetimik atuisut sumiluunniit atuisinnaalernissaannut.
