Nunanut allanut unammisartut piareerput

Futsalertartut 16-t Tjekkiami Generali Cuppimi unammeqataasussat nunanut allanut unammisartunut sungiusaasunit maanna toqqarneqarsimalerput. Unammisartut nunatsinni pikkorinnerpaat ilaat peqataasinnaanatik nalunaarsimapput, taamaammallu inuusuttut piukkunnartut periarfissinneqarsimallutik. 

Nunatsinni futsalertartuni pikkorinnerpaatut taaneqarsinnaagunartut, Kaassannguaq Zeeb aamma Hans-Karl Berthelsen IT-79-meersut, suliffitsik peqqutigalugit ilaasinnaasimanngillat. Markus Jensen N-48-meersoq, Maasi Maqe B-67-meersoq aammalu Nathan Møller Kâgssagssummeersoq ajoqusersimallutik peqataasinnaasimanngillat.  

Taakku tallimat unammigiaqataalinnginnerat nunanut allanut unammisartunut annaasaqaataavoq. Taamaattorli allat periarfissinneqarput. Periarfissinneqartut ilagaat Kâgssagssummi unammisartoq 20-nik ukiulik Pihillip Holmene.  

Assi © : KNR

Phillip Holmene U21-t pissartanngorniuunneranni arsalerillaqqinnerpaatut toqqagaanikuuvoq.

Taanna periarfissinneqartoq timersortartuuvoq pimoorussisoq. Phillip Holmene aalakoornartumik imigaasartornikuunngisaannarpoq pujortarnikuunngisaannarlunilu. Ukiut pingasut kingulliit tamaviaarluni arsartartutut inerisarnikuuvoq arsaaffiullu avataani timigissartarluni. 

Assi © : KNR

Frederik Funch

Maluginiagassat ilagaat B-67-imi unammisartoq 29-inik ukiulik Frederik Funch arsarlualeqqikkiartoqrnera. Taanna seeqqumigut ajoquserujussuarnermini qaammatippaaluni arsarsinnaanikuunngilaq. Maannali pitsaanerpaaffimminut uteqqikkiartulersoq takuneqarsinnaavoq. Nuummi februaarimi pissartanngorniuunnissamut anngunniuuttoqarmat Frederik takutitsilluarnikuuvoq.  

Kalaallit qallunaat unammissavaat

Ataasinngornermi marsip 13-ani nunanut allanut unammisartut Danmarkiliassapput. Tjekkiamullu ingerlaqqinnginnerminni 14-ani 15-anilu qallunaat unammisartui unammissavaat. Unamminerit matoqqasuussapput Gentoftillu timersortarfiani pissallutik. 

Nunanut allanut unammisartut:
1 Loke Svane - Måliniittoq Nuuk
2 Malik Hermarij - Måliniittoq Nuuk
3 Lars Erik Reimer - Nuuk
4 Philip Holmene - Maniitsoq
5 Frederik Funch - Nuuk
6 John Ludvig Broberg - Nuuk 
7 Ari Hermann - Nuuk 
8 Malik Juhl - Nuuk
9 Anders H Petersen - Nuuk
10 Niklas Thorleifsen - Nuuk
11 Nick Reimer - Ilulissst
12 Lars Peter Broberg - Qeqertarsuaq 
13 Elisæus Aminak - Nuuk
14 Nukannguaq Zeeb - Nuuk
15 Erni Tellesen - Qaqortoq
16 Patrick Frederiksen fra Danmark
17 Tekle Ghebrelul - Sungiusaasoq
18 René Olsen - Sungiusaasoq  

AAMMA ATUARUK Futsalimik nunanut allanut unammisartut piareersartut