Laila Mikaelsen takornarialerisunngorusuppoq, Airbnb-lli iliorneratulli inissaaleqilersitserusunngikkaluarluni

Aappagu Ilulissani mittarfik nutaap atulerneqarnissaanut illoqarfiit Ilulissap eqqaaniittut takornariaqarnerunissamut piareersarput. Laila Mikaelsen takornarialerineq inuussutissarsiutigerusuppaa, innuttaasulli eqqugaannginnissaat aamma eqqumaffigaa.

Allattoq Camilla Egeborg Møller

oktobarip 15-at 2024 07:27

Nutserisoq Steve Pedersen Hinrup

Inissiisarfikoq, kukkukuujuteqarfiunikoq, illuararlu. Taakkuupput unnuisarfiit tallimat Lailap Anda Mikaelsenillu takornarianut Qasigiannguanukartunut neqeroorutigisartagaat.

Aappariit 2016-imi Airbnb aqqutigalugu sinittarfinnik attartortitsisalerput, ukiualunnguillu qaangiummata attartortittagassaminnik illutaarput, suliffeqarfillu Mikami pilersillugu.

Airbnb suli ingerlappaat, kisiannili taanna aqqutigalugu akissarsiutiginerpaaffigisarinngilaat.

- Airbnb aningaasanik isertitaqarfigerujunngilarput. Oqarutta qulinik unnuisussaqartoq, ataaseq marlulluunniit Airbnb aqqutigalugu inniminniisimassapput, Laila Mikaelsen nassuiaavoq.

Laila Mikaelsen naapertorlugu inuit nunarsuatsinneersut soorlu USA-mit Australiameersullu Airbnb aqqutigalugu unnuisinnaasarnerat nittartakkap iluaqutigaa.

- Airbnb aqqutigalugu attartugassarsiortut nunat assigiinngittuneersuusaramik, taamaalilluni nunat allaqqinnaannguaninngaanniit Qasigiannguanut tikittoqartarpoq.

Inniminniisut ilamininngui Airbnb-meersuupput

Qasigiannguani Airbnb aqqutigalugu attartortitsisartorpassuit Laila Mikaelsen ilagaat, amerikarmiullu attartortitsisarfiat illoqarfimminni inissaaleqititsilersinnaanissaa ernummatiginngilaa. Sumiiffinni ornigarluarneqartuni Airbnb-iip sunniutaanik inissaaleqineq ajornartorsiutaalertarpoq soorlu Spaniami, Italiami nunanilu kiattuni amerlasuuni.

- Illoqarfitsinni innuttaasorpassuaqanngilagut, taamaattumik illusinissamik periarfissaqartarpoq, qimanneqartumik illumilluunniit nutartigassamik, Laila Mikaelsen oqarpoq.

- Illoqarfimmi nunaqqatigiit ataatsimiinneranni oqaluuserisarparput takornariaqarpallaalernissaq anguniangarinagu.

Mikami Guesthouse nittartakkatigut, Facebookikkut inuillu innersuussineritigut innimernerneqarnerusarpoq, taamaattumillu ikinnerit Airbnb aqqutigalugu inniminniisarput. Ukiunimi qulini kingullerni takornariat Qasigiannguanukarnerusalersimapput.

Nunarput aamma unnuinernut akitsuuteqassava?

Inatsisartut ukiaanerani ataatsimiinneranni nunatsinni takornariaqarnerup ineriartornissaa ukkatarissavaat.

Unnuinerup ataatsip inummut ataatsimut akitsuut 30 koruuneqassasoq siunnersuutit ilagaat. Akitsuut nunatsinni najugalinnut atuutissanngilaq, takornarissanulli atuutissaaq.

Akitsuut kommunet takornariaqarnermut ineriartortitsinissaasa ikorfartorneqarnissaat siunertaavoq.

Unnuinermut akitsuut nunatsinni atorneqarnikuunngilaq, nunaniilli allaniit takornariaqarluartunit soorlu Venedigimi Barcelonamilu unnuinermut akitsuuteqartitsisoqarpoq.

Unnuinermut 30 koruunimik akitsuusiineq nunarput nunanut allanut akitsuutit tungaatigut malinnaalerneranik inissiisinnaavoq.

Qaavatigut 30 koruunit aporfiunngillat

Takornarianut nunatsinneersuunngitsunut unnummut 30 koruuninik akileraarusiinissaq Inatsisartut ukiaanerani ataatsimiinnerminni suliaraat - hoteliugaluarpat, unnuisarfiugaluarpat Airbnb-ugaluarpalluunniit.

Nunatsinnut angalanissaq akisoreermat unnuinermut akileraaruteqalernissaa takornariat amerliartornerannut akornutaajunnanngitsoq Laila Mikaelsen isumaqarpoq.

- Kalaallit Nunarput nunarsuarmioqatitsinnit soqutigineqartuungami misigineqarusulluni, 30 koruuni eqqarsaatigissangaanni soqutaanngilaq immaqa.

Laila Mikaelsen saniatigut suliffeqarpoq, uialu igasutut sulilluni. Mikami Guesthouse sinneqartooruteqartitsisanngilaq, takornariaqarnerullu inuussutigilernissaa angorusuppaat.

- Takorluugaraarput takornariaqarneq siunissami inuussutigilersinnaajumaarlutigu, Laila Mikaelsen naggasiivoq.

Nutaarsiassami kukkunermik nassaarsimaguit uunga allaffigineqarsinnaavugut.