Lagmand nunatsinniittoq: Savalimmiut aarlerisaarinissamut radarimut akuersinissaat naatsorsuutigaara
Savalimmiormiut danskit Savalimmiuni sakkutooqarnikkut aarlerisaarinissamut radarimik pilersitsiniarnerannut akuersingajalersinnaapput.
Tamanna lagmandip, Bárður á Steig Nielsenip oqaatigaa. Taanna sapaatip akunnerani matumani nunatsinniippoq.
- Aarlerisaarinissamut radari Savalimmiuni soorunami oqallisigaarput. Radarimulli akuersingajalernissarput ilimagaara, Bárður á Steig Nielsen oqarpoq.
Bárður á Steig Nielsenip nunatsinniinnermini uku sammissavai:
Naalakkersuisut siulittaasuat, Múte B. Egede ataatsimeeqatigalugu
Inatsisartut siulittaasuat, Hans Enoksen ataatsimeeqatigalugu
Suliffeqarfinnut ilaatigut Royal Arctic Linemut aamma Royal Greenlandimut pulaarneq
Savalimmiormiut Nuummiittut naapinnerat
Ilisimatusarfimmut aamma Nunatta Katersugaasivianut pulaarneq
Tikerarnini Naalakkersuisut siulittaasuanik sisamanngorpat ataatsimeeqateqarluni naggasissavaa.
Aarlerisaarinissamut radari danskit naalakkersuisuisa Illersornissaqarfiup Issittumiinnerani sakkortusaaniarneranut pilersaarutaanni ilaavoq.
Tamanna Folketingimi partiit issittumi piginnasanik annertusaaniarneq pillugu isumaqatigiissuteqartut siorna saqqummiuppaat.
Annertusaaniarnermik pilersaarut Illersornissaqarfiup nunatsinni timmisartuaqqat inuttaqanngitsut atorlugit nakkutilliinerulernissaanik aamma ilaqarpoq.
Taamaattoqassanersorli suli qularnarpoq.
AAMMA ATUARUK Naalakkersuisut danskit illersornissamut isumaqatigiissutaat suli isummerfiginngikkaat
Danskit ministeriunerata Mette Frederiksenip nunatsinnut sapaatit akunneri marlungajaat matuma siorna tikeraarnerani Naalakkersuisut siulittaasuata, Múte B. Egedep Naalakkersuisut apeqqummut tassunga suli aalajangersimanngitsut erseqqissaatigaa.
Savalimmiormiut upernaap ingerlanerani aalajangissasut
Nunarpulli kisimi aalajangiinissamut kinguarsanngilaq.
Tassami naak savalimmiormiut siulittaasuata Savalimmiut sakkutooqarnikkut sakkortusaanissap ilaanut raadarimut tunngatillugu akuersinissaat ilimagigaluaraa suli aalajangiisoqanngilaq.
Bárður á Steig Nielsenip oqarnera naapertorlugu Savalimmiut assersuutigalugu radarimit qaammataasatigut assilisanik pissarsisinnaalissaneranut apeqqut pillugu isumaqatigiinniarneq sivisuvoq.
Tamatuma saniatigut nunatsinni saqqummiunneqartutulli Savalimmiut annertussaaniarnermut pilersaarummut iluamik ilaatinneqarsimanngitsutut misigisimasoq eqqaavaa.
1,5 milliardit koruuninik Issittumi nakkutilliinerunissamut aningaasaliineq
Folketingip illersornissaq pillugu isumaqatigiissutitaaq 2018-imi akueraa. Saniatigut 4,8 milliardit koruuninik Illersornissaqarfimmut 2023-p tungaanut aningaasaliinissaq isumaqatigiissutaavoq.
Partiit illersornissaq pillugu isumaqatigiissusiortut sualummik Atlantikup Avannaani Issittumilu 2023-p tungaanut nakkutilliinerunissamut saniatigut 1,5 milliardit koruuninik 2019-imi aningaasaliipput.
Isumaqatigiissummut aningaasaliissutit 1,5 milliardit koruuniusut affaat - tassa 750 millionit koruunit - timmisartuaqqanik ungasianiit aquttakkanik nunatsinni nunami nakkutilliissutaasussanik marlunnik pisinermut ingerlatsinermullu atorneqassapput.
50 millionit koruunit Kangerlussuarmi sakkutuunngorniarfissamut atorneqassapput.
390 millionit koruunit Savalimmiuni silaannakkut aalerinaarinissamut radarimut atorneqassapput.
Aarlerisaarinissamut radarimut akuersinissinnik nalunaaruteqarnissinnut piffissaq qanoq sivisutigissava?
- Eqqoriarpara aasartinnagu, Bárður á Steig Nielsen oqarpoq.
Lagmandip sakkutooqarnerulernissaa pileriginngikkaa
Savalimmiormiut siuttuata sakkutooqarnikkut Savalimmiuni najuuttoqarnissaanut pisariaqartitsisoqarnerusorinngilaa.
- Savalimmiuni najuunnerusoqarnissaa eqqarsaatigigukku Savalimmiuni sakkutooqarnikkut najuuttoqarnissaa nalinginnaasumik sulingiusimanngilarput. Taamaammat naatsorsuutigivallaanngilanga, lagmand oqarpoq, itisiliillunilu:
- Nunarsuaq nutaaq Ukrainemut saassussisoqarfiusoq takuarput. Tamanna qularnanngitsumik ukiut 30-t 40-llu kingulliit ingerlaneranni nalaassimasatsinnit allaanerusumik nunarsuarmi allatut tunngiliissaaq, Bárður á Steig Nielsen oqarpoq.
Ruslandimut niuerneq
Savalimmiut Nunat Killiisa EU-mut sunniuteqartitsinera taperserlugu siusinnerusukkut oqaatiginikuuaat.
AAMMA ATUARUK Ruslandimut kinguneqartitsinerit Savalimmiut tapersersorpaat
Sunniuteqartitsineq Ruslandimut inuussutissanik niueruteqarunnaarnermik piffissami matumani ilaqanngilaq. Savalimmiut siorna avammut niuerutaasa sisamararterutaat Ruslandimut niuerutigineqarput.
EU-lli sunniuteqartitsinera piffissap ingerlanerani inuussutissanik Ruslandimut tunisisarnernik unitsitsinermik ilaqalissappat tamanna Savalimmiut peqataaffigisinnaavaa.
- Taamaattoqassappat malitsinissamut aalajangiissaagut, taamaaliornissarput naatsorsuutigaara. Savalimmiuni suliffeqarfiit Ruslandimut nioqquteqarnerminnik namminneq unitsitsereerput, taamaakkaluartorli suli tunisaqartoqartarpoq, lagmand oqarpoq.
Bárður á Steig Nielsen sisamanngorneq ilanngullugu nunatsinniissaaq. Taassuma tikeraarnermini Naalakkersuisut siulittaasuat, Múte B. Egede ilaatigut ataatsimeeqatigissavaa.
