Tassa Naalakkersuisut isumaat apuuppara, Pele Broberg KNR-imut oqarpoq.Assi: KNR

Naalakkersuisut: 1,5 milliardit uagut susassarinngilagut

Danskit issittumi nakkutilliinisamut isumaqatigiissutaat Pele Brobergip toqqaannaq akuererusunngilaa.

Danskit issittumi nakkutilliinisamut isumaqatigiissutaat Folketingemi partiit februaarimi akuerisaat 1,5 milliardit koruuninik aningaasartalik, nunanut allanut tunngasunut naalakkersuisup, Pele Brobergip nunatta akisussaaffiginngikkaa oqarpoq.

- Nutaat Naalakkersuisuusugut ersarissumik isumatigiinnikuugatta sakkulersorneq akiorniarlugu suleqatigiinniarluta. Taamaammat danskit qanoq eqqarsarnerat oqaasertalerniarnagu qangalili taanikuuarput, Pele Broberg KNR-imut oqarpoq.

AAMMA ATUARUK Kalaallit Nunaanni nakkutilliinermut isumaqatigiissut piareertoq

Danmarkimi partiit issittumut 1,5 milliardit koruuninik ilaatigut nakkutilliinermut, sakkutuutullu ilinniarfissamut Kangerlussuarmiitikkusutaminnut aningaasaleereerneranni Naalakkersuisut isumaqatigiittut taama isummertut Pele Broberg oqarpoq.

- Sakkutuunngorsaarusunngilagut. Kangerlussuarmut pilersaarutaasimasut tassaapput sakkutuunngorsaanermut ilinniartitaaneq. Taamaattumik inissinneqarsinnaanngilaq uloriananngitsutut, sakkutuunngorsaanermut taanna tunngaveqarpoq.

Broberg: Naalakkersuisut peqataatinneqanngillat

Issittumi nakkutilliinerusunnisamut isumaqatigiissumi aningaasaliissutit affaat tassa 750 millionit koruunit timmisartuaqqanut assiliisartunut tassa dronenut atorneqarnissaat danskit isumaqatigiissutigaat.

Isumaqatigiissut danskit naalakkersuisuisa februaarimi atsioramikku illersornissamut ministeri, Trine Bramsen, TV2-mut ilaatigut ima oqarpoq:

- Suleqatigut savalimmiormiut kalaallillu qanittumik suleqatiginissaat, danskit naalakkersuisuinut pingaaruteqarluinnarsimavoq.

AAMMA ATUARUK Politikerit: Inatsisartut illersornissamut isumaqatigiissut takunngilaat

Naalakkersuisut siulii suliap killiffianut taamani paasitinneqartarput. Peqataatinneqaratilli. Pele Broberg taamaattumik allatut isumaqarpoq.

- Uagut siulitta paasitinneqaannartarnerat assigiinnarpaa massakkut uagut paasitinneqaannarpugut. Kisianni imaanngilaq taava uagut pigileripput. Taamaammat uagut akisussaaffigisinnaanngilarput, allat suliaat uagutsinnut nalunaarutigineqartoq.

Kalaallit issittumi nakkutillissasut

Inuit Ataqatigiit sinnerlugit Foketingemut ilaasortap, Aaja Chemnitz Larsenip, isumaqatigiissut ukioq atsiorneqarmat nuannaarutigaa.

Naalakkersuisut issittoq sakkulersorfigerusunnginnamikku issittumi nakkutilliisut tunngavissaat maanna pilersaarusiorpaat, Inatsisartullu tamaasa peqataatillugit suliamut tunngasut oqalliseqatigeqqaassavaat.

- Issittumi nakkutilliisut pilersinneqarnissaat, uagut inuiaqatigiit kalaallit tassani ingerlatsisuusussaalluta.

Taakkuli Issittumili Sakkutooqarfiup suliai akisusaaffigilissanngikkaat, nunattali nakkutigineqarnera akisussaaffiigissagaat taanna aamma oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat