Politikerit: Inatsisartut illersornissamut isumaqatigiissut takunngilaat
Naalagaaffiup Issittumi nakkutilliinerunissaanut isumaqatigiissut Inatsisartunut suli saqqummiunneqanngitsoq Danmarkimi tamanut saqqummiunneqarpoq.
Tamannalu nunanut allanut sillimaniarnermullu ataatsimiititaliap siulittaasuata, Aleqa Hammondip iluaagaa.
- Isumaqatigiissut Inatsisartunut pisortatigoortumik apuunneqanngilaq, nunanut allanut sillimaniarnermullu ataatsimiititaliap siulittaasua, Aleqa Hammond (NQ) taama oqarpoq.
Nakkutilliinerunissaq najuunnerunissarlu "Arktiske kapacitetspakke"-mik taaneqartumi isumaqatigiissutigineqarput, ilaatigullu illersornissamut nunatsinni ilinniarfeqalernissaq isumaqatigiissutigineqarluni.
AAMMA ATUARUK Kalaallit Nunaanni nakkutilliinermut isumaqatigiissut piareertoq
Inatsisartulli isumaqatigiissut takusimanngikkaat aamma Partii Naleeqameersoq, Pele Broberg oqarpoq.
- Susoqarnersoq uanga tusagassiorfinnit tusarfigaara, Pele Broberg oqarpoq.
1,5 milliardit koruuninik Issittumi nakkutilliinerunissamut aningaasaliineq
Folketingip illersornissaq pillugu isumaqatigiissutitaaq 2018-imi akueraa. Saniatigut 4,8 milliardit koruuninik Illersornissaqarfimmut 2023-p tungaanut aningaasaliinissaq isumaqatigiissutaavoq.
Partiit illersornissaq pillugu isumaqatigiissusiortut sualummik Atlantikup Avannaani Issittumilu 2023-p tungaanut nakkutilliinerunissamut saniatigut 1,5 milliardit koruuninik 2019-imi aningaasaliipput. Aningaasat taakkua qanoq agguarneqassanersut isumaqatiginninniutigileruttorpaat.
Danskit naalakkersuisui Socialdemokratit, Venstre, Konservative, Liberal Alliance Radikale Venstrelu illersornissaq pillugu 2018-imi isumaqatigiissusiortut isumaqatiginninnialeruttortuupput.
Folketingimi ilaasortat nunanit avannarlerneersut isumaqatiginninniaqataanngillat. Isumaqatiginninniarnerilli Naalakkersuisullu ataqatigiissarneqartut, danskit sillimaniarnermut ministereqarfiat ilisimatitsivoq.
Isumaqatigiissutip imarisaasa ilaat piffissaq sioqqullugu saqqummiuttoorutigineqartut, Aleqa Hammond isumaqarpoq.
- Tamanna isumaqatigiissut Inatsisartunut nunanut allanut sillimaniarnermullu ataatsimiititaliamut suli agguaanneqarnanilu Naalakkersuisunik suli ataatsimoorfeqanngitsugulluunniit suli tusagassiorfitsigut saqqummiunneqarneranik tunngaveqarpoq, Aleqa Hammond oqarpoq.
Danmarkip naalakkersuisuisa partiillu isumaqatiissuteqarfigineqartut isumaqatigiissut ippassaq saqqummiuppaat.
Naalakkersuisut isumaqatigiinniarnernut nunarput sinnerlugu peqataapput.
AAMMA ATUARUK Tusagassiuut: Timmisartuaqqat ungasianiit aquttakkat Kalaallit Nunaanni nakkutilliissutaalissapput
Taamali saqqummiunneqarnera Inatsisartuni politikerit marluk tupaallaatigaat.
Nunarput pineqartillugu nunatsinni politikerit peqataatinneqartassasut danskit naalakkersuisui arlaleriarlutik oqarput.
Nunatsinnili politikerit naammattumik peqataatinneqarsimanngitsut Aleqa Hammond Pele Brobergilu isumaqarput.
- Aali oqaatigineqartoq, illersornissamut aamma tunngatillugu uagut tusarniartassagaatigut, uagut nunarput pineqartarmat, Pele Broberg oqarpoq.
