Danskit illersornissamut ministeriata Trine Bramsenip (S) Issittumi nakkutilliinerunissamut isumaqatigiissutissaq sisamanngorpat saqqummiutissavaa. Socialdmeokratit, Venstre, Dansk Folkeparti, Radikale Venstre, Konservative Folkeparti aamma Liberal Alliance isumaqatigiissusiortuupput. Assi: KNR / Malik Brøns

Kalaallit Nunaanni nakkutilliinermut isumaqatigiissut piareertoq

Isumaqatigiissutissaq Illersornissaqarfiup Kalaallit Nunaanni Savalimmiunilu nakkutilliinerulerneranik malitseqassaaq. Taanna Københavnimi sisamanngorpat saqqummiunneqassaaq.

Danskit illersornissamut ministeriata Trine Bramsenip (S) Kalaallit Nunaanni Savalimmiunilu nakkutilliinerunissamut isumaqatigiissutissaq sisamanngorpat saqqummiutissavaa. 

Tamanna sakkutuut Københavnimi inaanni Kastellet-imi tusagassiortunik katersortitsinermi pissasoq, illersornissornissamut ministereqarfik ilisimatitsivoq.

Isumaqatigiissutissaq taanna "Arktis Kapacitetspakke"-mik ateqarlunilu 1,5 milliardit koruuninik saniatigut aningaasaliinertalimmik ilaqartoq, danskit naalagaaffiata illersornissaqarfiata naalagaaffeqatigiinni nakkutilliinerunissaanut tunngaviussaaq.

Isumaqatigiissutissap imarisaanut tunngatillugu nunatta kissaatai suunersut, nunanut allanut naalakkersuujunnaaqqammertoq Steen Lynge (D) naalakkersuisoqatigiinni sapaatit akunnerata siuliani allanngortoqarnera peqqutigalugu apersorsinnaasimanngilarput.

Folketingimili ilaasortap, Aaja Chemnitz Larsenip (IA), Kangerlussuarmi sakkutuunngorniarfeqalernissaa siusinnerusukkut kissaatiginerarpaa.

AAMMA ATUARUK Kalaallit Nunaanni nakkutilliinerusoqarnissaa pillugu isumaqatiginninnialeruttortut

Aamma taassuma Venstrellu nunatsinni inuussutissarsiornermik aallussallit innuttaasullu nakkutilliinermi peqataanissaat pisariaqarsoraat.

- Air Greenland immakkullu assartuisooreersut uani pivagut. Periarfissanillu sapinngisamik pitsaanerpaamik qulaajaanissaq Venstremiit nukingisaarutigaarput.

- Pinngitsoorani nakkutilliisussaatitaanermi upalungaarsimasussaatitaanermilu peqataatitassatut toqqakkatta piareersimalluarnissaat soorunami pingaaruteqarpoq, Venstrep illersornissaq pillugu oqaaseqartartua Lars Christian Lilleholt KNR-imut oqarpoq.

Tunumilu silaannarmi nakkutilliineq nakkutilliinerulernerup ilagissagaa aamma ilimagineqarpoq.

Aningaasallu ilaat NATO-p Tuluit Nunaata, Islandip Kalaallit Nunaatalu akornanni silaannarmi nakkutilliinerulissutissaanik Savalimmiuni nutaamik radarertaarnermut atorneqassangatinneqarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat