Laali Berthelsen arpannermi rekordiliivoq

Cecilie-løb llulissani ingerlanneqarmat 136-it peqataapput. Arnani rekordiliisoqarpoq angutinili ajugaasup rekordi sekundit 30-it inulaarlugit angunnginngitsoorpaa.

Allattoq Noah Mølgaard

juulip 11-at 2011 12:21

Aaqqissuisut ajorinngivippaat silassaq DMI-meersoq uniormat. Sialussaq ilimasaarutigineqarsimagaluartoq Oqaatsuniit Ilulissanut arpanneq silagissumi ingerlanneqarpoq.

Takinermut 22,5 kilometerimut arpannermi arnani ajugaasuuvoq Laali Berthelsen atorsimallugit 2.06,20 tiimit taamaasillunilu Cecilieløb-imi aatsaat taama arnani sukkatigisumik arpattoqarpoq. Laali Berthelsenip taamaasilluni qaangerpaa Marit Holm-ip siorna rekordia 2.08,11 tiimit. Laali Berthelsenip qaninnertut malinnitsigivaa Akitsinnguaq Jensen 2.15,40 tiimit arpattoq pingajuuvorlu Pipaluk Kristensen atorsimallugit 2.16,14 tiimit.

Arpannissaq sioqqullugu ilimagineqareersimavoq Frederik Petersen ajugaajumaartoq taanna aamma Aasiaat marathon-imi juunimi ajugaammat. Frederik Petersenip ajugaanermini atorpai 1.39,30 tiimit. Taamaasilluni siorna Cecilieløbimi rekordini angunngitsoorpaa taamanikkut 1.39,05 tiimit atoramigit. Angutini Pilutaq Berthelsen sukkanermut tullersortaavoq atorsimallugit 1.47,34 tiimit pingajuuvorlu Karl Peter Kristensen atorsimallugit 1.49,00 timer.

Arpannermi isorartussutsinut sisamanut unammisoqarpoq. Takinermut arpattut Oqaatsuniit Ilulissanut 22,5 kilometer-erput. Ilai Kangerluarsummiit Ilulissanut arpattut 14 kilometer-erput. Naannerup tullianoortut Qasigiarsuarniit Ilulissat 6 kilometeri arpapput kiisalu naannermoortut mittarfiup eqqaani Itisuarsummiit Ilulissanut 3 kilometeri arpapput.

Angusat tamakkiisut ataani linki toorlugu takusinnaavatit.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.