Suliniut nutaaq: Avannaata Kommuniani illoqarfiit atuarfiini tamani siunnersortit
Atuarfik Mathias Storchimi aamma Atuarfik Jørgen Brønlundimi atuartut saaffigisinnaasaanik inunnik isumaginninnermut siunnersorteqarneq ukioq manna atorneqalerpoq.
Kisianni inunnik isumaginninnermut siunnersorti ataaseq atuarfinnut marlunnut, katillugit 640-t missaanni atuartulinnut, amigartoq pilertortumik paasineqarpoq. Taamaattumillu Atuarfik Mathias Storchimi inunnik isumaginninnermut siunnersortitut atorfimmik aamma pilersitsisoqassasoq septembarip qaammataani aalajangerneqarpoq.
Taamani kommuunimit ilanngullugu ilisimatitsissutigineqarpoq Avannaata Kommuuniani atuarfinni allani pisariaqartitsisoqarnersoq aamma misissuiffigineqassasoq.
AAMMA ATUARUK Meeqqat atuarfianni atuartunik isumaginninneq annertusarneqalersoq
Illoqarfinni nunaqarfinnilu pineqartuni atuartut amerlassusaat:
- Atuarfik Edvard Kruse, Uummannaq: 179
- Prinsesse Margrethe Skolen, Upernavik: 197
- Kullorsuup Atuarfissua, Kullorsuaq: 77
- Avanersuup Atuarfia, Qaanaaq: 117
Maannalu - qaammatip ataatsip qaangiussimalernerani - Avannaata Kommuniata kommunalbestyrelsia aalajangerpoq meeqqat atuarfiini Uummannami, Upernavimmi, Kullorsuarmi Qaanaamilu inunnik isumaginninnermi siunnersortitut atorfinnik aamma pilersitsisoqassasoq.
- Upperigatsigu socialrådgiverit atuarfinni sulilersinnerisigut annertuumik kivitsisoqarumaartoq. Soorlu tamanna Ilulissani maannakkut malugineqarsimasoq aallaavigalugu taamatut aalajangernikuuvugut, Avannaata Kommuniani ilinniarneq pillugu ataatsimiititaliami siulittaasoq Jens Kristian Therkelsen oqarpoq.
Pisariaqartitsineq Meeqqat Illersuisuat peqatigalugu nalilersorneqartoq
Avannaata Kommuniani meeqqat atuarfiini inunnik isumaginninnermi siunnersortinik pisariaqartitsisoqarnersoq kommuunip meeqqat illersuisuat peqatigalugu misissuiffigisimavaa.
Meeqqammi illersuisuata Qaanaami meeqqat ikiortariaqartut erngertumik ikiorneqarneq ajortut angalareerluni ilaatigut nalunaarusiarinikuuaa, soorlu aamma Uummannami Upernavimmilu, taakkualu nunaqarfiini, tarnimikkut inooqataaniarnermikkullu ajornartorsiuteqartunik meeraqartoq aamma nalunaarusianikuungaa.
AAMMA ATUARUK Qaanaami meeqqat ikiortariaqartut erngertumik ikiorneqarneq ajorput
Pineqartunilu tamani meeqqat ajornartorsiutigisatik pillugit saaffissaaleqisarlutik oqariartuuteqartarsimapput.
- Aammalu ulluinnarni atorfilittat ilisimasaat aallaavigalugit taamatut siunniussaqarpugut. Tassa pisariaqartitsisoqartoq takusinnaangatsigu, Jens Kristian Therkelsen oqarpoq.
Nunaqarfimmi 77-inik atuartulimmi inunnik isumaginninnermi siunnersorti
Illoqarfinnili meeqqat atuarfiini inunnik isumaginninnermi siunnersortinik kisimi atorfinitsitsisoqassanngilaq. Upernaviummi nunaqarfiini avannarlersaq, Kullorsuaq, 440-nik innuttaqarlunilu 77-nik atuartoqartoq atuarfimmini aamma inunnik isumaginninnermi siunnersorteqalissaaq.
- Kullorsuaq aamma immikkut annertuumik isiginiarnikuuarput. Atuartut amerlassusaat aallaavigalugit nalunnginatsigu aamma meeqqat amerlatillugit ilaatigut aamma pinngitsoorneqarsinnaasanngitsoq arlaatigut ikorfartortuliisoqarnissaa, Jens Kristian Therkelsen oqarpoq.
Avannaata Kommunianit inunnik isumaginnerni siunnersortitut atorfiit ukiumi nutaami inuttassarsiorneqalernissaat naatsorsuutigineqarpoq.
