Løkke Issittoq immikkut sammisaralugu ataatsimeersuaqataajartorluni nunatsinniittoq
Danmarkip nunanut allanut tunngasunut ministeria Moderatineersoq, Lars Løkke Rasmussen, ulluni makkunani nunatsinniippoq.
Kalaallit Nunaanni politikerit Savalimmiuniillu politikerit Issittoq immikkut sammisaralugu ataatsimeersuarnissaannut peqataassaaq.
AAMMA ATUARUK EU Nuummi ataatsimiinnissamut qaaqqusisoq: Issittoq oqallisigineqassaaq
Løkkep naalakkersuisut ataatsimeeqatigissavai, nunanut allanut tunngasuni naalakkersuisoq Siumumeersoq, Vivian Motzfeldt, savalimmiormiullu nunanut allanut tunngasunut inuussutissarsiornermullu naalakkersuisuat Tjóðveldimeersoq, Høgni Hoydal, ilaatigut ataatsimeeqatigissallugit.
Naalakkersuisut EU-lu ataatsimeersuarnermik Katuami pisussatut aaqqissuisuupput.
Lars Løkke Rasmussen Danmarkip nunanut allanut tunngasunut ministereqarfia sinnerlugu tusagassiorfinnut nalunaarummi ima ilaatigut oqarpoq:
- Kalaallit Nunaata nunanut allanut tunngasunut naalakkersuisua Københvanimi sapaatit-akunnerisa marluk matuma siorna ataatsimeeqatigaara. Oqaloqatigiinnerput Nuummi maanna nangipparput, qanimullu suleqatigiinneq nalaatsorneriinnaanngilaq.
AAMMA ATUARUK Allagaammi takutsaaliukkami: Kangerlussuaq sakkutooqarfiulissaaq
- Kalaallit Nunaata, Savalimmiut Danmarkillu akornanni suleqatigiinnerup nukittorsarneqarnissaa, Danmarkimi naalakkersuisoqatigiit pingaartippaat, pingaartumik nunanut allanut sillimaniarnermullu tunngasuni. Taamaammat ministerinngoqqammiinnarlunga Nuummut tikeraarsinnaagama nuannaarutigaara, taanna tusagassiutinut nalunaarummi oqarpoq.
Issittoq siunissaq eqqarsaatigalugu pingaaruteqassaaq. Pingaartumik Ruslandip Ukrainemik ukiup ataatsip matuma siornatigut saassussinerata kingorna, Ruslandimmi Issittoq aamma aallutaraa.