EU Nuummi ataatsimiinnissamut qaaqqusisoq: Issittoq oqallisigineqassaaq
Politikerit nuiumanerusut, Issittumi naalagaaffinnit aallartitat qaffasissumik atorfillit kiisalu nunap inuiinit aallartitat Issittumi nunat tamalaat akornanni suleqatigiinneq Nuummi Katuami ulluni aggersuni oqaluuserissavaat.
EU-mi Issittoq Pillugu Oqalliffik aammalu Nunap Inuiisa oqaloqatigiiffiat taama allappoq.
Peqataasut Issittumut issittullu inuiinut tunngatillugu pissutsinik misissuillutillu oqaluuserinninnissaat pilersaarutaavoq.
Naalakkersuisut siulittaasuat, Danmarkimi, Sverigemi, Savalimmiuni, Norgemi Finlandimilu nunanut allanut tunngasunut naalakkersuisut kiisalu Norgemi Samtingimi siulittaasoq peqataasussat ilagaat.
EU-p Issittumi oqaloqatigiittarfia
Ulloq siulleq tassa februaarip arfineq-pingajuat EU-mut Issittumullu tunngassaaq, tassanilu Issittumi piffissami kingullermi ineriartorneq siunissamilu unammillernartut oqaluuserineqassapput.
Pisussat nassuiaatiginerat:
- Nunap inuiinit inuusuttunillu aallartitat isiginninnertik saqqummiutissavaat Issittumilu siunissami suleqatigiinneq oqaluuseralugu.
- Peqataasut EU-p Issittullu akornanni pissutsit taakkulu qanoq imminnut sunniivigeqatigiinnersut misissussavaat.
- Peqataasut issittumi aningaasaqarnerup ineriartornera innuttaasunut qanoq iluaqutaasinnaanersoq oqaluuserissavaat.
- Peqataasut silap pissusiata allanngoriartornerani unammillernartut aamma issittumi naalagaaffiit qanoq ilillutik silap pissusiata aarlerinarneranut akiuussinnaanerat misissussavaat.
Nunap inuiisa oqaloqatigiiffiat
Ullup aappaa kingullerlu tassa februaarip qulingiluaat issittumut apeqqutinut nunap inuiinut sunniuteqartunut tunngatillugu paasisimasallit oqallinnerannik imaqarpoq.
Pisussat nassuiaatiginerat:
- Peqataasut EU nunat tamalaat Issittumi suleqatigiinnerannik annertusaanissamut qanoq ikiuussinnaanersoq ilaatigut oqallisigissavaat.
- Peqataasut Issittumi inuussutissanik qulakkerineq aamma najukkami najugaqartut nunallu inuiisa nunat akornanni politikkikkut aningaasaqarnikkullu unammillernartitaat oqaluuserissavaat.
- Peqataasut issittumi ilisimatusarneq, ilisimatuutut misissuineq aallarnisaanerlu misissussavaat. Matumani ilisimasatoqqat aamma ileqqutoqqat kiisalu najukkami nunallu inuiisa inuiaqatigiivisa EU-p Issittumi ilisimatuutut misissuinerannut qanoq ilillutik tapersiisinnaanersut.
Ullunut marlunnut pilersaarutit tamarmik uani nassaarineqarsinnaapput.
