Kuupik ukiortaami pilluaqqusivoq

Nipilersortartut Kunuk Platou aamma Miki Jakobsen ilassinninnermi aliikkusersuipput, Sumékkut atortagaat "Inuit Nunaat" ilaatigut appillugu. Kuupik Kleistillu oqalugiarnermini taanna oqariartuut ullunut atukkatsinnut assut tulluartippaa.

Naalakkersuisunut ilaasortat Mimi Karlsen aamma Ove Karl Berthelsen, Inatsisartullu siulittaasuat Josef Motzfeldt, aamma Danmarkip Nunanut allanut tunngassuteqartunut ministeria Villy Søvndal ilassinninnermi peqataapput, soorlu aamma Inuussutissarsiornermut, Naalagaaffimmilu pissutsinut ministeri Margrethe Vestager peqataasoq. Ilassinninneq siornatut tuluttut, qallunaatut tuluttullu oqaluttunut avinneqarsimavoq.

Qallunaat naalakkersuisui inerititaqarfiulluartumik suleqatigineqarnerat ukiuni siuliinisut Kuupik Kleistip qujassutigaa. Ukiortaamiillu kalaallit kissaataasa arlallit malinneqarnerat eqqaavaa. Kalaallit Danmarkimi palasiata aapperneqarnissaa, CIA-p tigusanik timmisartuussisarsimaneranik misissuinissaq, Issittormiut sinniisoqalernissaat, kalaallillu Danmarkimi najugallit sumiginnakkat pillugit suliassamut pilersaarusiaq. Taamaattoq qallunaat naalakkersuisuinik isumaqatigiinniarneq oqinninnerulersimanngitsoq Kuupik Kleistip erseqqissarpaa.

- Tassani pingaarnerpaajunngilaq Naalakkersuisuusut sumik qalipaateqarnersut, qanorlu eqqarsartariaaseqarnersut. Pingaarnerpaajusoq tassaavoq Nunarput eqqarsaatiglugu suleqatigiilluarsinnaaneq, isumaqatigiinniarnernilu angusaqarsinnaaneq. Maanna naalakkersuisuusut tapersersoraluarlugit oqaatigisinnaanngilara isumaqatigiinniaruminarnerulersimasut. Neriuppungali angusaqarusunnermut politikkikkut piumassuseqartoqarumaartoq,  Naalakkersuisut siulittaasuat Kuupik Kleist oqarpoq.