Kuupik Barroso-mut pulaarpoq

Naalakkersuisut siulittaasuata Kuupik Kleistip Nunatta EU-mut isumaqatigiissutaa OLT-milu ilaasortaanera pillugit EU kommissionimi siuttut ullumi ataatsimeeqatigigai, Naalakkersuisut tusagassiuutinut nalunaaruteqarput.

- EU kommissionip siulittaasuata Jose Manuel Barrosop ataatsimeeqatigineqarnera, EU-mut isumaqatigiissutit nutarterneqarniarnerinut pingaaruteqaqaaq. EU-mummi isumaqatiissutit ilaatigut aalisarnermut, ilinniarnermut OLT-mullu atassuteqarnermut ullumikkut tunngassuteqarput. Tassami OLT aqqutigalugu EU-mi suliniutinut assigiinngitsunut nunarput atassuteqarpoq, EU-milu niuernermi akileraaruteqannginnissaq aqqutissiuunneqarsimalluni, Kuupik Kleist allappoq.

Nunatta karsia ukiumut 320 millionit koruunit missaanniittunik EU-kommissionimit pissarsisarpoq.

- Nunatta EU-mut attaveqarnera pingaaruteqartuuvoq, assigiinngitsutigummi ataatsimoorussatsinnik soqutigisaqaratta. Tassami EU-p mingutsitsinngitsumik aningaasarsiornerulernissaanut Nunarput tapertaalluarsinnaavoq. Taamaammat Namminersorlutik Oqartussat EU kommissionillu siunissami suleqatigiissutigisinnaasaat qanimut oqaloqatigiissutigineqarput, Kuupik Kleist allappoq.

Nunatta EU-mut aalisarnermik isumaqatigiissutaata nutarterneqarnera 2012-ip naalernerani politikkikkut akuerineqarnissaa naatsorsuutigineqarpoq, nunattalu EU-mut suleqatigiissutissaasa isumaqatigiinniarneri maanna ingerlanneqaleruttorlutik.

Nunatta OLT-mi siulittaasuutitaqarnera iluatsillugu, EU-p ineriartornermut kommissæria Andris Piebalgs Kuupik Kleistip ataatsimeeqatigaa, tamatumani nunatta aamma EU-p imarpissuup akornanniinnerat pissutaalluni killeqarfittalu inissisimanerisa immikkuullarinnerat erseqqissarneqarput. Tassa taama inissisimanerup nunarsuarmut sunniutigisinnaasaasa periarfissarissaarnerat nittarsaanneqarlutik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat