Kuupik: Akisussaaffiit sinneruttut ukiut qulit ingerlaneranni tigusinnaavagut
Kalaallit Nunatta Namminersulernissaa qanoq anguneqassanersoq pillugu isumaqatigiissut akisussaaffeqalernermik kinguneqartitsisussaq ernumaammisitsisarpoq. Ingammik isumaqatigiissummi pinerluuteqarsimasunut isumaginnittoqarfik, eqqartuussiveqarfik, Sulinermullu nakkutilliisoqarfik assigisaasalu akisussaaffigilernissaat ernumaammisitsipput. Taakkumi ingerlannerat 350 million koruuninik naleqarmat. Immikkoortummi 30-it missaanniittut tapiissutinik ilaqartinnagit
Danmarkimiit nuunneqartussaapput.
Kuupik Kleist, IA-mi siulittaasoq, Namminersornissarlu anguniarlugu ataatsimiitsitaliarsuarmi ilaasortaq ernumanartoqannginneragaavoq:
- Akisussaaffiit ukiuni tulliuttuni ataasiakkaarlugit imaluunniit arlalikkaarlugit tigujartuaarnissaat naatsorsuutigineqassaaq, tassami uuliasiunngikkaluarluta imaluunniit allatigut annertoorujussuarnik aningaasanik ataatsikkut isaatitsinngikkaluarluta nunatta aningaasarsiornikkut nammineeriartornera malunnarpoq, taamaasillunilu aamma immikkut pisoqanngikkaluarpalluunniit akisussaaffinnik annertunerusunik tigooraanissarput periarfissaqalertussaavoq, aningaasarsiornitta pitsanngoriartornera ilutigalugu.
Aningaasarsiornitta annertusiartornera ilutigalugu ukiut qulit missaanni ingerlaneranni akisussaaffiit sinneruttut tamarmik nunatsinnut nuunneqareersimanissaat takorloorneqarsinnaasoq Kuupik Kleist isumaqarpoq.
Naalakkersuisut inatsisartullu nammineerlutik aaliangertartussaavaat qaqugukkut akisussaaffiit sorliit tiguneqartassanersut. Tunngaviusumik inatsisip iluani akisussaaffigilerneqarsinnaasut.
