Kuupik: Aaqqissuusseqqinerit isumaqatigiissutigisigit

Aningaasaqarnerup siuariartornerata qajannarneranik mianersoqqusineq, kommunit naligiinnginnerannut appariaataasinnaasunik siunnersuuteqartarnissamik inassuteqarneq aamma siammasissumik isumaqatigiinniarnermut illuatungiliuttunut qaaqqusissut.Tassa ilaatigut tamakkuupput Naalakkersuisut siulittaasuata, Inatsisartut ukiaanerani ataatsimiilerneranni ammaanersiorluni oqaaseqaatai siunnersuutaalu.
septembarip 20-at 2011 11:05

Uuliasiornermit kiisalu raajat aalisakkallu allat akiisa nunarsuatsinni qaffannerisa kingorna, Nunatta karsia taakkunannga isaatitsiffigineqarsimavoq, taamaakkaluartoq Nunatta aningaasaqarnerata siuariartornera qajannartoq, Naalakkersuisut siulittaasuata Kuupik Kleistip oqariartuutigaa.

- Taamatut Nunatta aningaasarsiornerata ilorraap tungaanut ineriartornissaa Naalakkersuisuni malartaaserluta malersortuassavarput pisortat aningaasarsiornerat qulakkeerniarlugu, siumukarnerlu tamanna qajannartuuvoq. Uuliamik ujarlernerit aappaagu nanginnissaat aammalu aalisakkat tunisassiatta nunarsuarmi akigissaarnerisa ingerlaannarnissaat qulakkeerneqarsinnaanngillat. Taamaattumik akisussaassuseqartumik aningaasarsiornikkut politikkerisarput ingerlatiinnassavarput, Kuupik Kleist aammaalluni oqaaseqarnermini ilaatigut taama oqarpoq.

Kommunit aningaasaqarnerisa assigiinnginnerujussuat Naalakkersuisut siulittaasuata ernumanartoqartippaa, kissaatigalugu illoqarfinni ataasiakkaani inuit ataasiakkaat oqartussaaqataalernissaat anguniarneqassasoq, taamaalilluni nunami sumiikkaluaraanniluunniit innuttaasut tamarmik assigiimmik atugassaqarniassammata.

Naalakkersuisut siulittaasuata ammaanersiornermi oqaaseqaataat Inatsisartuni ullumi nalunaaqutaq ataatsimut oqallisigissavaat.