Kuummiut 100-liivoq
Ullorsiorneq ullaarli aallartinneqarpoq, erinarsoqatigiit Kuuppalaap Nipaa erinarsorlutik, erfalasullu arfineq pingasunut amuneqarput, kingornalu nunaqarfimmi aqutsisut siulittaasuat Boas Boassen tunumiutut, kitaamiutut qallunaatullu oqalugiarluni.
Ullorsiornermilu pisussat ilaatigut makkuusut nunaqarfimmi aqutsisuni siulittaasoq oqaluttuarpoq:
- Oqaluffiup saannguaniikkami imaatigut ajunaarsimasut eqqaassutissaat, taanna naalagiarneq naammassippat kransilerneqassaaq. Tassalu erinarsoqatigiit aamma atuisussaapput ullormut tunngasumik. Naammassippatalu iliveqarfiliaassaagut, taakaniinnitsinnilu pisoqartussaavoq, soorlu erinarsoqatigiit erinarsussapput, Kuummiuni aqutsisut siulittaasuat Boas Boassen oqaluttuarpoq.
Kuummiut oqaluttuassartaa ilaa
Kuummiut oqaluttuarisaaneranut qivialaarutta, siornatigut taanna inuit najuaqarfiginikuusimavaat Tsiarngarmiinik ateqartillugu, tassa siorarmiut.
Nunaqarfik Saqqisikuik ukiut 50-it qaangiuttut 1965-imi inuisa ilaat Kuummiunut pinngitsaalillugit nuutsinneqarmata, tamannalu pimmat Kuummiormiut 100-nik amerleriapiloorput.
Kuummiutoqqani illukut issumik ujaqqanillu qarmakkat inaasa eqqaanni, ippassaq ataatsimut innuttaasut pisortatiguunngitsumik ammaanersiorlutik aallartipput.
Boas Boassen, nunaqarfimmi akisussaasutut ukiut hunnorujunngortorsiornermi pisussanut pissangavoq.
Kommuneqarfik Sermersuup borgmesteria, Asii Chemnitz Narup, Naalakkersuisunut ilaasortat marluk, Vittus Qujaukitsoq aamma Mala Høy Kúko nalliuttorsiornermi peqataapput.
Tunngaviliisut kinguaavi
Kuummiuni tunngaviliisimasut kinguaavi nunaqarfitoqqap ilaani oqalugiassapput.
- Taakku Kuummiunik tunngaviliisimasut Johanne aamma Kârale Andreassen kinguaavi, ernutai, massakkut maaniittut oqalugiartussaapput kalaaliminernillu sassaalliisoqassalluni, Kuummiuni aqutsisut siulittaasuat Boas Boassen oqarpoq.
