Kunngissap nulia Mary nunatsinnut kingullermik 2016-imi tikeraarpoq. Assi: Scanpix

Kunngissap nulia ullumi tikissaaq - ukulu suliarissavai

Kunngissap nulia illoqarfiit pingaarnersaannut tikeraariartorluni ullumi tikissaaq.

Kunngissap nulia Mary Nuummut ullumi tikissaaq. Kunngissap nulia sivikitsumik tikeraassaaq, tassami sisamanngorpat aallaqqeriissaaq.

Taanna Nuummut kisimi tikeraassaq, kunngissallu nulia aaqqissuussinerni arlalinni peqataassaaq Mary Fondenimilu siulittaasuuffigisamini ataatsimiissalluni.

Mary Pinngortitaq pillugu nunarsuaq tamakkerlugu suliniaqatigiiffik WWF ullumi nalunaaqutaq 13.45-mit - 15.30-mut pulaassavaa sunngiffimmilu ornikkamit Aqqalumit meeqqat peqatigalugit sissami plastikkinik katersissallutik.

Tamatuma kingorna Mælkebøttenimut tassa meeqqanut inuusuttunullu sunngiffimmi sammisassaqartitsiviullunilu ornittakkamut aamma qimarnguimmut nalunaaqutaq 15.45 pulaassaaq.

Tassunga pulaarnera Mælkebøttenip ukiunik 15-inngorsiorneranik malunnartitsisoqarnissaanik pissuteqarpoq. Ornittagaq ukiuni 16-ini pioreeraluarpoq, coronali pissutigalugu nalliuttorsiutiginninnissaq kinguartinneqarnikuuvoq.

Knr.gl-ikkut malinnaagit

Kunngissap nuliata pilersaarutai nalunaaqutaq 9.30 aallartissapput, tassanilu Hotel Hans Egedemi ataatsimiinnermut “aliasunneq ataatsimoorutsigut”-mik taaneqartumut peqataassaaq. Taanna Det Nationale Sorgcenterip aaqqissuussaraa.

Ataatsimiinneq nalunaaqutaq 11.30 naammassissaaq, ullup qeqqasioreernerullu kingorna Ilisimatusarfimmut nalunaaqutaq 13.15 pulaassaaq. Tassanilu aaqqissuussinermut Unleashimik taaguuteqartumut inuusuttut 200-t nunanit avannarlerneersut issittumeersullu Naalagaaffiit Peqatigiit nunarsuami anguniagaannut atatillugu ineriartortitsillutillu isumassarsiorfigisaannut peqataassaaq.

Inuusuttut aaqqissuussinermi tassani nunarsuarmi peqqissutsip qanoq pitsanngorsarneqarsinnaanera, ilinnialernissamut pitsaanerusumik periarfissaqalernissaa, silallu pissusiata ilungersunartumik inissisimanera eqqartorpaat.

Maryp ullormut pilersaarutai nalunaaqutaq 15.30 Unicefimut pulaarnermik naggaserneqassapput. Marylu tamatuma kingorna angerlamut aallaqqissalluni.

Kunngissap nuliata tikeraarnera Knr.gl ullumi aqagulu malinnaassaaq. Aamma illit radioavisikkut Qanoruukkullu malinnaasinnaavutit.

Kunngissap nulia Mary nunatsinnut kingullermik 2016-imi tikeraarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl