Kunngikkormiut inuuissiortoornerannut peqataasussat toqqarneqarput

Angititaq Motzfeldt aamma Ivalu Grønvold Kunngikkormiutut Ataqqinassusillip, Prins Christiaap, oktobarimi inuuissiornerata nalliussinerani Kalaallit Nunaat sinnerlugu peqataassapput.

Allattoq Nicole Sander Bertelsen

septembarip 20-at 2023 16:23

Nutserisoq Kunuunnguaq Fleischer

Kunngikkormiutut Ataqqinassusillip, Prins Christiaap 18-inik ukioqalerluni inuuissiornini nalliuttorsiutiginiarlugu qaaqqusaminut ukioqatiminut 200-nut matut ammarpagit, Kalaallit Nunaanniit aallartitatut Angititaq Motzfeldt Narsameersoq aamma Ivalu Grønvold Aasianneersoq qaaqqusanut ilaassapput.

Taama Naalakkersuisut Siulittaasuata Naalakkersuisoqarfia allappoq.

- Kalaallit Nunaata Kunngikkormiutut Ataqqinassusillip, Prins Christiaap inuuissiornissaanut qaaqqusaanera attortissutigivara.

- Prinsimik naapitsinissaq kulturikkut misigisaassaaq alutornartoq, annermik oqaluttuarisaaneq, ileqqut ileqqulersuutillu kunngikkormiuni atuuttut ataqqippagit, taama Ivalu Grønvold tusagassiuutinut nalunaarummi oqarpoq.

Aallartitaq eqqorluinnartoq

Inuusuttut marluk qinnuteqartut arlallit akornanni toqqagaapput. Namminersorlutik Oqartussani aamma Air Greenlandimi ilinniartut peqataasussanik toqqaasuupput. Ataatsimiititaliaq isumaqarpoq Angititaq Motzfeldt Nunarput sinnerlugu aallartitassatut toqqassallugu eqqorluinnartuusoq.

Aamma atuarukInuusuttut marluk nunatsinneersut prins Christianip 18-iliinissaanut qaaqqusaassasut

Angititaq Motzfeldt Qaanaami peroriartorpoq. Illoqarfik Kunngisaq Frederiup immikkut atassuteqarfigisaa.

- Taamaammat ataatsimiititaliaq isumaqarpoq Angititaq Motzfeldt-ip kunngikkormiut nalliuttorsiornerannut peqataasussatut eqqortuusoq, tusagassiuutinut nalunaarummi allaqqavoq.

Nalliuttorsiornerit ingerlanneqassapput Christiansborg Slot-imi oktobarip 15-iani Prins Christiaap inuuissiornerani.

Nutaarsiassami kukkunermik nassaarsimaguit uunga allaffigineqarsinnaavugut.