Kunngi inunnit nuannaaqalutik avaallattaartunit Katuami tikilluaqquneqarpoq – qungujulasunili aamma poltikkikkut neriuuteqartoqarpoq
Kunngi Nuummiunit nuannaaqalutik avaallattaartunit ersaattaassisunillu Katuami tikilluaqquneqarpoq: "Hurra, hurra, huraaaah."
Ersaattaatunik ingiorteqarluni Kunngi Katuami pingasut qaangilaannguaraa kaffillerpoq.
Kunngip naalakkersuisut siulittaasuat Jens-Frederik Nielsen (D) inersuaaqqami nerrivimmi takkajaami kaffisorlunilu kaagisornerani, nerriviit tamarmik inoqangaatsiarlutillu inersuaq ulikkaaqqavoq.
Danmarkimut ataqatigiinnermik nukittuumik neriuuteqarneq
Dorthe Hegelund Kjeldsen takkuttunut ilaavoq. Taassuma Kalaallit Nunaata Danmarkimut suleqateqarnissamik ataatsimooqataanini Kunngimut takutikkusullugu takkuppoq.
- Tikeraarnera Danmarkilu suleqatigiinnerulersissagaatigut neriuutigaara. Donald Trumpi, qinersineq, spiralilersuisimaneq Nalerarlu pillugit ukiuunera naallugu aalassassimaartoqarnikooqaaq. Kisianni soorluuna inuit massakkutut ittussaaneranik takutitsiinnartut, taanna oqarpoq.
Kalaallit Nunaat qaammatini kingullerni maluginiarneqarsimaqaaq. Amerikap præsidentiata Donald Trumpip, USA-p Kalaallit Nunaat tiguartariaqaraa arlaleriarluni oqartarnerata kingorna tamanna pivoq.
Kunngi akunnerup affaanngitsorluunniit Katuamiippoq. Dorthe Hegelund Kjeldsenip isersimanera pikkunarnerarpaa.
- Pisarnerattut ingerlavoq – pilersaarut maleqqissaarlugu. Kunngimi nunamut tunngasuugami assinganik pissusilersorfigaarput. Aammami taamaatsikkusukkunavippaa, taanna oqarpoq.
Rebekka Olsvig aamma Ataqqinartorsuaq naapikkusullugu takkuppoq.
Kunngi Frederiup qanoq asaneqartiginera nunarsuarmioqatinut takutissallugu taassuma pingaartippaa.
-Nunarsuarmioqatitta qanoq asatigigipput takusinnaaniassammassuk aamma Danmarkimut Kalaallit Nunaannullu pingaaruteqarlunilu nuannersuusoq isumaqarpunga. Kalaallit Nunaat nunarsuaq tamakkerlugu maanna ilisimalernikuuaat. Taamaattumik Danmarkimut Europamullu atanerput takusinnaanngussavaat.
Kunngi kaffillereernerup kingorna Jens-Frederik Nielsen peqatigalugu qaqqamukarput. Kunngi pilersaarutit malillugit aqagu aallartussaavoq. Kunngikkormiuniilli – sila apeqqutaalluni – sisamanngornerup tungaanut maaniissasoq paasissutissiissutigineqarpoq.
