Kunngi Frederik frimærkimi nutaami assiliartarineqassasoq
PostNordip frimærki nutaaq kunngi Frederimmik assiliartaqartoq saqqummersilerpaa.
PostNord tusagassiuutinut nalunaarummi paasissutissiivoq.
- PostNordimit kunngikkormiut nutaat frimærkini piffissami sivisuumi tulluusimaarlutalu ileqquusumik saqqummersittarpagut, taamaattumillu Danmarkimi kunngit nikinnerannik malunnartitsiniarluta frimærkimik saqqummersitsinissarput qilanaarilluinnarparput, PostNordimi attaveqaqatigiinnermut pisortaq, Andreas Brethvad tusagassiuutinut nalunaarummi oqarpoq.
Frimærki kunngip inuuiani tassa, sapaat maajip 26-ani saqqummersinneqassaaq, taannali PostNordip nittartagaatigut pingasunngorneq maajip 22-anili piniarneqarsinnaalissaaq.
Kunngi Frederik kunngitut aatsaat siullermeerluni frimærkiniissaaq.
Taanna meeraaraallunili frimærkini assitaliunneqartalerpoq.
Kingornalu 18-iliinermini, dronning Margrethep atuunnermini akunnaalliliinerani, dronning Marylu katinnermini kiisalu kunngissap Frederiup kunngissallu nuliata Mary aningaasaateqarfianut katersiniarnermut aamma assitaliunneqarnikuuvoq.
Frimærki Danmarkimi, nunatsinni Savalimmiunilu saqqummersinneqassaaq.