Prins Christianip assilinera frimærkiliarineqartoq
Kunngikkormiutut ataqqinassusilik prins Christian nalliussineqangajalerpoq.
Prins Christianimi oktobarip ulluisa 15-ianni 18-iliissaaq, tamannalu inuusuttunik nunat nalaagaaffeqatigiinneersunik 200-t missaanniittunik illussaarsuarmi qittannertalimmik nalliussineqassaaq.
18-iliinerali allatut aamma malunnartinneqassaaq. Tassa Tusassip taassumalu ataaniittut allakkeriviit kunngikkormiut ilaata assinganik frimærkiliamik nutaamik saqqummersitsisarnerat ileqquuvoq, tamatumuunalu tassa prins Christianip assilinerata frimærkiliarineqarnera 18-iliineranut atatillugu saqqummersissallugu.
Kunngikkormiut nittartakkaminni taama allapput.
Kunngikkormiut nalliuttorsiornerannik malunnartitsisartut
Kunngikkormiut nalliuttorsiornerannik malunnartitsineq Tusassimi taassumalu ataaniittuni allakkerivinni ileqquuvoq.
Dronning Magrethemmi 2020-mi 80-iliineranut atatillugu frimærkemik nutaamik aamma saqqummersitsipput. Tassa dronning Magrethep kalaallisoortup assilineranik frimærkiliaq saqqummersippaat.
Frimærkitaarlu maanna saqqummersitaat prins Christianip annoraallip assilineraneersuuvoq.
Frimærki taanna oktobarip ulluisa 16-ianni nioqqutaalissaaq.
