Kunngi Frederik atuakkiamik saqqummersitsisoq

Kunnginngoqqammersoq, kunngi Frederik qulingat, tamat uissuummissutigisaannik atuakkiamik pingasunngornermi saqqummersitsivoq.

Kunngikkormiut inoqatinut attaveqaqatigiittarfikkut Instagramikkut taama nalunaarput.

Atuakkap aqqa tassaavoq "Kongeord", kunngi Frederiup Naalagaaffimmi siuttutut suliassani akisussaaffinilu pillugit eqqarsaatersuutai atuakkiami atuarneqarsinnaallutik.

Atuakkap 112-inik quppernillip Frederiup kunngit tulleriiaarneri, Danmarkip oqaluttuarisaaneranik kristumiussusermillu isiginninnera sammineqarput.

Guuti kunngi Frederiup kunnginngornermi oqaasinnaarilikkamini toqqaannartumik ilaatinneqanngitsoq nammineq nassuiaatigaa, oqaasinnaarilikkamini oqaatsimi "ataqatigiinneq"-mi toqqaannanngikkaluartumik ilaatinneqartoq nassuiaatigalugu.

- Inuttut ataqatigiinnerput takutikkusuppara - immitsinnut ataqatigiittugut, kristumiussutsitsinnut ataatsimullu oqaluttuarisaanitsinnut, kunngi atuakkiami ilaatigut oqarpoq.

Kunngi Frederiup naalagaaffeqatigiinneq atuakkiami aamma oqaluuserigaa DR-ip allaaseraa:

- Kunngitut dronningitullu naalagaaffeqatigiinni ataqatigiissitsiniartuassaagut, Kalaallit Nunaata, Savalimmiut Danmarkimilu kunngeqarfiup sinnerata akornanni ataqatigiinneq sapinngisatsinnik sakkortunerulersinniarsarissallugu. Naalagaaffeqatigiinnermi aqqutigalugu ataqatigiinnerput puigussanngilarput. Tamanna pisussaaffiliivoq, kunngi oqarpoq.

Kunngip maannamut inuunera kunngissatullu inuusuttuunermiit ilaqutariit ittuattut ineriartornera - maannalu kunnginngornera atuakkiami aamma oqaluttuarineqarput.

Kunngip oqaasii Jens Andersenimut oqaluttuarineqarput, Jens Andersenillu oqaatsit atuakkianngortippai.

Taassuma kunngissaq Frederik pillugu atuakkiaq "Under Bjælken" siusinnerusukkut aamma atuakkiaraa.