- Kunngi Frederik ikinngutinnersuugami assiliseqatigiuminartuuvoq

Kunngi Frederiup nunatsinnik, kulturitsinnik kalaallinullu asannissuseqarnini isertorneq ajorpaa, kunngitulli qanoq issava? Oqaluttuarisaanermik ilisimatusartoq Ujammiugaq Engell ima ilimagisaqarpoq.
- Frederik ataatsimoornermik misigiffiginerpaasarparput, Marylumi, oqaluttuarisaanermik ilisimatusartoq naliliivoq. Assi © : Scanpix
januaarip 15-at 2024 11:03
Nutserisoq Nathan Kreutzmann

- Dronningi nunatsinnut asannissuseqartorujussuuvoq, kunngissarli Frederik suli ingasanneruvoq.

Kunngissaq Frederik kunnginngoruni qanoq ittuussanersoq oqaluttuarisaanermik ilisimatusartoq Ujammiugaq Engell sapaatit-akunnerata siuliani aperineqarami taama akivoq.

Oqaluttuarisaanermik ilisimatusartoq nalorninngilluinnarpoq:

- Dronningi eqqartornerlunnianngikkaluarpara, kisianni utoqqaanerunera malunnartarpoq. Pisussaaffiilu amerlasarput, aammami taamaattariaqarunarpoq. Kunngissalli malitassat maleqqissaanngikkaluarlugit allatut iliortarpoq. Inuppalaarnerunermillu takutitsivoq.    

- Neriuutigaaralu taamaaliuinnarsinnaatitaajumaartoq. Tassa inuiaqatigiinnut qanilaarnermik takutitsisarnera inunnillu naapitsigaangami naligalugit ilisarsillunilu pisaannassasoq neriuutigaara, Ujammiugaq Engell oqarpoq.

Pissutsini allanngortittariaqanngikkaa

Kunngissaq maanna kunnginngorsimalerpoq. Kunnginngortorlu pissutsiminik allanngortitsinani anaanamisulli inunnik naapitsigaangami kulturimik ataqqinnittarnini allanngortissanngikkaa Ujammiugaq Engell oqarpoq.

- Taamaaliortareerpoq, taamaattumik kunnginngoraluaruniluunniit nalorsarpallaarnavianngilaq, taanna oqarpoq.

Dronning Margrethep nunatsinnut asannissuseqarnerujussuani ataqqinninninilu takutittareerpaa, taamaattumik ataqatigiinneq Frederiup kunnginngornerani suli qanilaarnerusutut misiginassasoq oqaluttuarisaanermik ilisimatusartup qularutiginngilaa.  

- Dronningi tunuarniarluni nalunaaruteqarmat Facebookikkut allattorpassuupput. Allattut siulliit uattulli tupaallassimaqaat, kingusinnerusukkulli kunngissaq Frederiup assingi puttutillattaalerput. Assini takuneqarsinnaasarpoq taassuma kalaallit qanilliivillugit selfieqatigalugit assiliseqatigisarsimagai.   

- Dronningi taamaaliinnarluni assiliseqatigineqarsinnaanngilaq, Frederimmilli assiliseqateqarneq pissusissamisuuginnarpoq. Taannalu Frederimmut misigissuseq taamaaginnassasoq ilimagaara.

- Inuppalaarluni ikinngutinnernermik misigititsisarnini attatiinnassagaa neriuutigaara, aamma kunngitut ukiortaami oqalugiaraangami naalagaaffeqatigiinneq eqqaaginnarnagu aamma tikeraallattaartarumaartoq neriuppunga.

Siulittuuteqarsinnaanngitsoq

Frederiup kunngitut qanoq ittuunissaa pillugu Ujammiugaq Engell siulittuuteqarsinnaanngikkaluarluni, taamaattoq Frederiup inuppalaarnermik attassiinnarusunnissaa ilimagaa.

- Frederik nunatsinnut tikeraaqqikkuni siornatigornit pisussaaffeqarnerulertussaassasoq ilimanarpoq, namminerli kinaassutsini aamma pisortatigoortumik pisussaaffini ataqatigiissinniarumaarai qularinngilara, taanna oqarpoq.  

Kunnginngortorlu dronning Maryp ikiorluarneqarumaaraa oqaluttuarisaanermik ilisimatusartup qularinngilaa.

- Maryp ilassilluarnikooqaatigut, danskillu arnartaannit sorpassuartigut paasilluarnerusinnaagunarpaatigut, taannami uatsitulli kikkut tamarmik imminnut nalunngitsuni qeqertameersuuvoq, taanna oqarpoq.

Oqaluttuarisaanermik ilisimatusartoq Ujammiugaq Engell. Assi © : Nicole Sander/ KNR

Kunngi Frederiulli kalaallinit nuannarineqarnerunissaa qularutissaanngitsoq oqaluttuarisaanermik ilisimatusartoq naqissusiivoq.

- Frederik ataatsimoornermik misigiffiginerpaasarparput, Marylumi, taanna naliliivoq.

- Mary nuannareqaarput, aamma aappariittut nuannarivagut, taamaattumik kunngissaq Christian taamatulli nuannaritigissagipput ilimagaara.

- Frederiup Maryllu angajoqqaatut ilaqutariittullu pissusaat tarrarsorfiusinnaasarput, qanilaarnermillu takutitsisarnertik attatiinnassagaat neriuppunga.

- Atagumi paasinarsiumaarpoq, taanna naggasiivoq.