Sammisaq: Kunngit nikinnerat

Kunnginngortitsineq: Nunatsinniit kunngikkormiunut pisortatigoortumik tunissuteqartoqassanngitsoq

Naalakkersuisut siulittaasuat Múte B. Egede kunngissap Københavnimi sapaatiuppat kunnginngornissaanut peqataassaaq. Nunatta inui sinnerlugit maanna tunissuteqarnavianngikkaluarluni Naalakkersuisunit tunissutissamik nassassaaq.
Kunngissaq nulianilu ataqqinartorsuartut nunatsinnut siullermeerlutik tikeraarpata, kunngit nikinnerat pisortatigoortumik nalliuttorsiutigineqassaaq. Assi © : Ida Marie Odgaard/Ritzau Scanpix
Allattoq Hanna Vestergaard Hviid, Paarnannguaq Nielsen
januaarip 12-at 2024 12:36

Naqqiut: Naalakkersuisut kunnginngortitsinermut atatillugu tunissuteqarnavianngitsut siusinnerusukkut allaqqavoq. Tamanna eqqunngilaq. Namminersorlutik Oqartussanit tunissuteqartoqassaaq, kunngikkormiulli nunatsinnut aatsaat tikeraarpata, nunatsinniit pisortatigoortumik tunissuteqartoqassaaq.

Dronning Margrethe naalagaaffimmi qullersaasoq tunuarmat, kunngissaq Frederik sapaatiuppat kunnginngussaaq.

Naalakkersuisut siulittaasuat Múte B. Egede taamaattoqarnerani peqataajartorluni Danmarkimussaaq.

Taamaakkaluartoq dronningimut kunnginngortussamulluunniit nunatsinniit pisortatigoortumik tunissuteqartoqassanngilaq.

Naalakkersuisut siulittaasuata naalakkersuisoqarfiata pisortaata Hans Peder Barlach Christensenip KNR-imut tamanna uppernarsarpaa.

- Kunngi aappannilu nunatsinnut pisortatigoortumik aatsaat tikeraaqqaarpata nunatta inuinit tunissuteqarfigissavagut, taanna oqarpoq.

KUNNGINNGORTITSINEQ

Dronning Margrethep sapaammi januaarip 14-ni tunuarniarnini ukiortaami oqalugiaateqarnermini saqqummiummagu innuttaasut tupaallaatigaat.  

Taassuma dronninginngorneraniit ukiut 52-eqqissaat qaangiuttullu ernera kunngissaq Frederik kunnginngussaaq.

Ministeriuneq Mette Frederiksen (S) Christiansborgip aneersuaartarfiani sapaatiuppat nunatta nalunaaqutaa naapertorlugu ullup-qeqqanut kunnginngortumik nalunaaruteqareerpat Kunngi Frederik X siullermeerluni innuttaasunut sassassaaq.

Kunnginngortoq taassuma kinguninngua innuttaasunut oqaaseqassaaq.

Nuummi Katuami kaffillernissamut kikkulluunniit tikilluaqqusaapput. Kaffillernerup nalaani kunnginngortitsineq isiginnaarussuakkut toqqaannartumik malinnaavigineqarsinnaassaaq.

Kunnginngortitsineq KNR-TV-kkut nal. 05.00-imiit ulloq tamaat malinnaavigineqarsinnaassaaq. 

Kongens Nytorvimiit toqqaannartumik aallakaatitsineq TV2 Danmark suleqatigalugu KNR2-kkut tallimanngorpat nal. 16.30 isiginnaarneqarsinnaassaaq.  

Allisiguk

Namminersorlutik Oqartussani taakkualu ataaniittut tamarmik erfalasulersorneqassapput, tamatumali saniatigut kunnginngortitsineq Kunngi Frederik Dronning Marylu nunatsinnut aatsaat tikeraarpata pisortatigoortumik nalliuttorsiutigineqassaaq. Naalakkersuisut tusagassiutinut nalunaarummi taama allapput.

Múte B. Egedeli Danmarkimut tikeraarnermini Naalakkersuisunit kunnginngortussamut tunissuteqassasoq, Hans Peder Barlach Christensenip ilanngullugu oqaatigaa.

Aamma atuaruk

Ritzau

Slovakiami præsidenti inuunerminik navianartoriorunnaarpoq

Eqqumiitsulianik saqqummersitsivissamut millioni kingulleq ukioq manna pissarsiarineqassaaq

Nunatsinniit Iqalunnut timmisartuussisoqartalissaaq