Savalimmiormiut lagmandiat, Aksel V. Johannesen kunnginngortussap nuliatalu ilasseqatiginninnissaanut sapaatiuppat ilaassaaq.

Tamanna lagmandip Ritzau-imut sms-ikkut uppernarsarpaa.

Ministeriuneq, Mette Frederiksen (S) aamma Folketingip siulittaasua, Søren Gade (V) qaaqqusanut ilaasut B.T-p pingasunngornermi allaaseraa.

Tassanilu Savalimmiunit nunatsinniillu sinniisut aamma qaaqquneqartut allassimavoq. Savalimmiunit sinniisoq tassaavoq Savalimmiuni lagmandi.

Naalakkersuisut siulittaasuat, Múte Bourup Egede aamma peqataassaaq.

Naalakkersuisut Ritzau-imut paasissutissiipput.

B.T-p paasissutissaatai naapertorlugit ilassinninnissamut inuit arfinilinnit arfineq-pingasunut qaaqquneqarput.

Ilassinninni Naalagaaffimmi siuttut siunersioqatigiinnerata kingunitsianngu kunngissaq Frederik kunnginngoriarpat pissaaq. Danskit nalunaaqutaat malillugu nalunaaqutaq 14.00 Siunersioqatigiittoqassaaq.

Ilasseqatigiinneq danskit nalunaaqutaaq malillugu 14.30 aallartissaaq, kunngissarlu nalunaaqutaq 15.00 Christiansborg Slotip aneerasaartarfianit kunngitut nalunaarutigineqassalluni.

Nunatsinni naalakkersuisut siulittaasuata, Múte B. Egedep imaluunniit Aksel V. Johannesenip dronning Margrethep tunuarniarluni nalunaaruteqarnera ukiortaami januaarip aallaqqaataani oqalugiaamminni eqqaanngilaat.

Múte B. Egedep oqalugiarnermini kalaallit arnat assammik arsartartut nunarsuarmi pissartanngorniuteqataanerat peqqinnissaqarfiullu "ilungersuuteqangaatsiarnera" erseqqissarpai.

Aksel V. Johannesenip oqalugiarnera dronning Margrethep tv-kkut oqalugiaqqammernerani savalimmiuni ukiutoqqami tv-kkut aallakaatinneqarpoq. Lagmandip oqalugiarnera allagaareersimavoq.

Taassumalu tassunga taarsiullugu tusagassiuutinut nalunaarummi dronningi "suliniuteqangaatsiarsimaneranik tatiginartuulluarneranillu" qujassuteqarfigaa.