Assit Kulusummi meeqqat aasaq susassaaleqitinneqanngillat
- Qaqqasiornermi nangiartarluni nangiarnalaarsinnaavoq, kisianni pituutalerluta qaqqasioratta taanna nuannerneruvoq ilaatigullu nangiarnalaartarluni. Nuannerpoq, Kulusummi 8. klassemi atuartoq aasaq sammisassaqartitsivinni peqataasimasoq, Nanna Marie Bajare, taama oqarpoq.
Islandimiut qaqqasiornermik skakkernemillu ilinniartitsinerisa saniarigut
Belgiemiit qitinnermik sungiusaasut, franskinit cirkusimi isiginnaartitsinermik sungiusaasut, Amerikkamiit qalipaanermik ilinniartiitsisut aamma takkupput.
Tassalu nunani allamiut kajuminneq tunngavigalugu tikeraartut Kulusummiuaqqanik aasaanerani sammisaqartitsilluavisimapput.
Sunngiffimmi susassaqartitsinermik ingerlatsisoq naapertorlugu aasaanerani susassaqartitsineq meeqqat piumassuseqarnerannut oqaatsinillu piginnaasaqarnerannut iluaqutitaqarpoq.
- Meeqqat ammanerulertarput, taavalu nunanit allaneersunut soqutiginninnerat annertunerulertarluni . Taamatullu pisoqaqqinnissaanut tullianimut piukkoortarlutik, allamiunik sammisassaqartinneqarnisartik soqutigalugu. Taava aamma oqaatitsigut soorunami ilikkarnerusarput, tuluttut ilikkarnerusarput, Justine Boassen taama oqarpoq.
Sammisassaqartitsoqarnerani peqataasup aamma tamanna uppernarsarpaa. Taassumalu susassaaleqiffissaraluamini sammisassaqartinneqartarnini nuannaarutigaa.
- Aasaanerani atuanngiffimmi ullaakkut iteraanni susassaaleqinalaartarami, pinnguartarfeqarnani. Taava tikittoqaraangat ilaaniarsarisarpunga tamatigut, Nanna-Marie Bajare taama oqarpoq.
Kulusummi nunanit tamalaaneersut aasaanerani tikeraartut namminneq kajumissutsiminnik sungiusaasimasut aasaqqinnissaanut tikeqqinnissaminnut pilersaaruteqartut sunngiffimmi sammisassaqatitisup oqaatigaa.
