Kukkunersiuisut: Simon Olsen aqutsinerluppoq
Aalisarnermut piniarnermullu naalakkersuisup Simon Olsenip ingerlatsinera Inatsisartut kukkunersiuisuinit sakkortuumik avoqqaarineqarpoq. Naalakkersuisup aqutsinera sanngiippallaarpoq, taamaalillunilu soqutigisaqaqatigiinnit qinikkanillu ataasiakkaanit akuliunniarneq ajornanngippallaarluni. Kukkunersiuinermut ataatsimiititaliami siulittaasoq Isak Davidsen Siumumeersoq oqarpoq aalisarnermut pisortaqarfimmi pissutsit qangarsuarli taamaarusaarsimasut, iluarsiiniaraluarnerillu iluatsinngitsoortarsimasut. Oqarpoq kukkunersiuisut isumaqatigiilluinnarlutik aalajangiusimagaat pisortaqarfinni ingerlatsinerit taamaattut qinigaaffiup ingerlanerani sakkortuumik malersorneqassasut.
- Pitsaasumik tikkuussisumik naalakkersuisoq (Simon Olsen, aaqq.) suliaqartariaqarpoq, suleriaatsiminillu aaqqissuusseqqittariaqarpoq pitsaanerusumik ingerlatsinissaq siunertaralugu, Isak Davidsen oqarpoq.
Aalisarnermut piniarnermullu pisortaqarfik soraarummeertuuguni angusinngitsuussagaluarpoq. Kukkunersiuisarfik Deloitte ikiortigalugu pisortaqarfimmi sanngiiffippassuit qulaarneqarput. Tamakkununnga ilaavoq aalisarnermik soqutigisaqaqatigiit qinikkallu ataasiakkaat pisortaqarfimmut akuliussorpallaarnerat. Aammali naalakkersuinikkut aqutsisup aallaffissornikkullu aqutsisup isumaqtaigiinnginnerat ajoqutaasut angisuut ilagigaat kukkunersiuisut siulitttaasuat Isak Davidsen oqarpoq.
-KNAPK APK-lu aalisarnermut annertuumik oqaasissaqaqataapput, naalakkersuinermili sulianut akuliuttussaanngitsut kialuunniit nalunngilaa,misissuisitsinitsigulli erserpoq annertuallaartumik akuliunniartoqartarsimasoq, Isak Davidsen oqarpoq.
Kukkunersiuinermut ataatsimiititaliaq isumaqarpoq aalisarnermut pisortaqafiup naalakkersuinikkut aqutisua, Simon Olsen, sanngiippallaartoq.
-Atorfilittatigut aqutsineq kiisalu naalakkersuinikkut aqutsineq annertuumik isumaqatigiinngiffiusarpoq, tamannalu anigorneqartariaqarpoq, Isak Davidsen oqarpoq.
Inatsisartut kukkunersiuisuisa uparuaassutaat iluarsiniarlugit Simon Olsenip neriorsuutigereersimavaa, taamaaliorumaartorlu kukkunersiuisut upperigaat Isak Davidsen oqarpoq.
Neriorsuutinili eqquutinngippagit kukkunersiuisut uniinnarumanngillat.
-Kialuunniit naatsorsuutigisinnaavaa taama annertutigisumik uparuaallutalu pereeratta iluarsiisoqarnianngippat uparuaanivut sakkukilliartornavianngitsut, Isak Davidsen oqarpoq
Kukkunersiuisut sinneri tassaapput Kiiu Olsen, IA, Doris Jakobsen, Siumut, Jakob Sivertsen, Atassut, aamma Palle Christiansen Demokraatit.
