Kujataani sakkortuumik timersorneq aallartippoq
Tassani ilaatigut arpanneq, sermersuarmut sikkilerneq qaqqasiornerlu timersuutigineqarlutik.
Timersornermit tusagassiuutinut nalunaartartoq Nivi Kleist aperaarput Narsarsuarmi ullumikkut ingerlanneqartoq qanoq ingerlasimanersoq.
- Ullumikkut ulloq siulleq ingerlanneqarpoq, silap ajornera pissutigalugu peqataasussat kingulliit ullumi aatsaat tikipput, ilaallu kingulliulaarlutik aallarlutik.
Nammineq piumassutsiminnik ikiuuttussanik suli amigaateqarpugut, ingammik arfiningorpat sapaatiuppallu Qaqortumi sikkilernissaannut ikiuutussanik amigaateqarpugut.
Ullumi peqataasuni siulliullutik apuussimapput holdi Team Kontorhusene, taassumalu inuttarai Martin Gjødvad aamma Martin Reuter.
Aqagu Greenland Adventure Race-mi peqataasut Narsarsuarmit Qassiarsuliassapput. Aqqutissaanni kuuk sakkortuallaamik kuummat timersortussat kuuk qaangerlugu angallammik ingerlanneqassapput, tassanngaanniillu sikkilerlutik Qassiarsuliassallutik.
