Kujataani borgmesteri ilaasunik angallassinermut aaqqiisoqaqqusisoq

Kiffartuussinermut isumaqatigiissut pillugu ukiup affakkaartumik kommunip nalilersuinera maanna qaammatit tallimanngulerput tunniukkatsiguli, taamaakkaluartorli Naalakkersuisut tungaannit qisuariartoqanngilaq, tamanna pillugu Kommune Kujallermi, borgmesteri, Kiista P. Isaksen qisuariaateqarpoq.

- Taamaammat isumaqarpunga, kommunep innuttaasut peqatigalugit ilaasunik angallassinermi pissutsit atuutsinneqartut ajornartorsiutinillu nassataqartaqisut pillugit Naalakkersuisunut Inatsisartunullu erseqqissaateqartuarnissaa pissusissamisoorluinnartoq, borgmesteri oqarpoq.

Kujataani angallannikkut kiffartuussinissamut Disko Line siorna ajugaasuuvoq. Taamaalilluni Air Greenland kiffartuussiunnaarpoq. Disko Line kiffartuussilermat imaatigut silaannakkullu angallassineq atuutsinneqalerpoq. 

AAMMA ATUARUK Kiffartuussinermut isumaqatigiissut assuarineqartoq angalasoqarnerutitsisoq

Disko Linellu kiffartuussinera borgmesterip naammaginngilaa, taamaattumik aaqqiissuteqartoqarnissaa anguniarlugu Naalakkersuisut Disko Linep aaqqiissuteqarnissaanut piumaffiginnissasut, 
borgmesteri  tusagassiuutinut nalunaaruteqarpoq.

- Kissaatigigaluaqaara Naalakkersuisut aamma Disko Line A/S nassuissasut, kiffartuussinissamut isumaqatigiissummi siunertarineqartut timitalersorneqarnerat amigaateqarpallaartoq aammalu innuttaasut pisariaqartitaat naapertorlugit sullissinissaq pisariaqartoq, borgmesteri Kiista P. Isaksen ilaatigut taama oqarpoq.

Angallannermut naalakkersuisoq, Erik Jensen sermitsiaq.ag-mut oqarpoq, borgmesterip isornartorsiuinera pimoorullugu, aamma Disko Linep ajornartorsiutaasut pillugit nassuiaateqassasoq.