Kujallermi ilinniartitsisut meeqqat pisinnaatitaaffii pillugit ilisimasaqarnerulerput
NAKUUSAp suliniutaani ilinniartitsisut kommunillu tassaapput suleqatigisat pingaarnerpaat, taassumalu meeqqat atuarfianni atuartut najukkaminni imminnut attuumassuteqartunut isummaminnik tusarneqarnissaata qulakkeerneqarnissaa akuutinneqarnissaallu siunertarivaa.
Suliniutip kommunini sisamaasuni kommunalbestyrelsinut nunap atuarfiinit 84-iusunit, ilagivaa meeqqat sinnerlugit oqaaseqartartussanik pilersitsinissaq - aammali illuatungaanut.
- Suliniutip meeqqat sunniuteqaqataanissamut pisinnaatitaaffiat qulakkiissavaa, neriunarporlu siunissaq ungasinneq eqqarsaatigalugu meeqqat siunissami atuarfinni inuiaqatigiinnermut tunngassuteqartunut oqallittarnertik atorluartalerumaaraat, suliniummi aqutsisoq Najaaraq Møller tusagassiuutinut nalunaarummi allappoq.
Siorna oktoberimi Qeqqata Kommuniani Kommuneqarfik Sermersuumilu ilinniartitsisut NAKUUSAmit pikkorissartinneqarput, taakkulu kissaataat malillugu ullormik ataatsimik maanna pikkorissartitsineq ilaneqarluni.
Aamma atuaruk Nakuusa e-bogimik meeqqanut saqqummersitsivoq
- Massakkumut kommunini pingasuusuni ilinniartitsisunik pikkorissaanerit ingerlatereerpavut - Qeqqata Kommuniani, Kommuneqarfik Sermersuumi Kommuni Kujallermilu, ukiullu ingerlanerani Qaasuitsup Kommuniani pikkorissaajartorumaarluta. Taamaalilluta sineriammi atuarfinnit tamanit kommunalbestyrelsinut attaveqarnissamut aqqutissiuilersimassalluta, Najaaraq Møller itisiliilluni aamma allappoq.
- Meeqqat Pisinnaatitaaffii pillugit paasisaqarneroqaanga ilutigisaanillu qanoq taakkuninnga atuartitsissusiorsinnaanera aamma ilikkarnerullugu. NAKUUSAllu atuarfiit minnersaannit timelærerit ilinniartitsullu qaaqqusimammatigit immikkut maluginiarneqartariaqarsoraara isumaq torrassorigakku, taakku ulluinnarni tusarpiarneqarneq ajormata, Bjørn E. Jokumsen Nanortallip Atuarfianeersoq taamatut oqaaseqaateqarpoq.
Ilinniartitsisullu pikkorissarneq ilikkagaqarfigisimarpaluppaat:
NAKUUSA UNICEF Danmark Naalakkersuisullu suleqatigiinnerisugut pilersinneqarnikuuvoq, suliniummilu atuartitsinermi najoqqutarineqarsinnaasut, Nunatsinnilu nalunnginneqarluartut soorlu: ”Suli anaanamik, suli ataatamik!”, ”Qaamanerup qinngoqqavaatit” kiisalu saqqummersitaat kingulleq ”YES! Pisinnaatitaaffitit nukiupput!” suliarineqarnikuupput.
