Krusep ukiukkut tuttunniartarneq sivikilligaa pisassaqarnerulersilluguli
Inuussutissarsiutigalugu piniartut nunap immikkoortuini amerlanerni februaarip 18-ianiit marsip qulinganut tuttunniarsinnaatitaagaluarput. Tamannali 2018 aallartippat sapaatip akunnipajaamik sivikillineqartussanngorpoq.
Aalisarnermut piniarnermullu Naalakkersuisoqarfik naalakkersuisut nittartagaanni taama allapput.
AAMMA ATUARUK Piniarnermut Siunnersuisoqatigiit tusarniarneqanngillat
Piniarsinnaatitaanerannut piffissap sivikillinera Pinngortitaleriffiup nunap immikkoortuini Sisimiut-Kangerlussuaq aamma Akia-Maniitsumi pisortatigoortumik tuttunnik kisitsisussanngorneranik peqquteqarpoq.
Nunalli immikkoortuisa ilaanni tuttuttassat 150-imiit 200-inut qaffanneqarput, tamannalu uumassusilerisup WWF-imeersup, Kaare Winther Hansenip isornartorsiornartoqartippaa.
- Pisassat amerligukkit, piniariartortut amerlanerussapput, uumasunullu akornusersuineq annerulissalluni, Kaare Winther Hansen oqarpoq.
AAMMA ATUARUK Ukiuunerani tuttunniarnerup sivitsuiffigineqarnera WWF-ip isornartorsioraa
Nunarsuarli tamakkersulu pinngortitaq pillugu suliniaqatigiiffiup, WWF-ip sooq inuussutissarsiutigalugu piniartut ukiuunerani piniaqqusaasarnerat paasiuminaatsippaa.
- Ukiuunerani piniarneq nalinginnaasumik ajornartorsiutaavoq, piffissarmi taanna tuttut iluminniittoqarfigisarpaa akornusersorneqarnerminnullu malussarinnerusarput, taamaammat ukiuunerani piniartoqartarnerata uumasut akornusersussavai.
Piniarsinnaatitaanermulli piffissaritinneqartoq sapaatit akunnerinik pingasuniit marlunnut sivikillineqarnera WWF-ip nuannaarutigaa.
Kaare Winther Hansenip ukiuunerani piniarneq 2018 Naalakkersuisunit unitsiinnarneqartariaqarsorialuarpaa, Pinngortitaleriffillu tuttut amerlassusaannik paasissutissanik katersereerpat inuussutissarsiutigalugu piniartut ukiuunerani aatsaat piniarsinnaatitaatileqqillugit.
AAMMA ATUARUK Ukiukkut tuttunniarnerup allanngortinnera naleqqutinnginneraraat