Ukiukkut tuttunniarnerup allanngortinnera naleqqutinnginneraraat
![](/sites/default/files/styles/image_934x467/public/article_images/tuttut_rensdyr_alf_sollund_flickr.jpg?itok=uOPUlZ52)
Ukiuunerani tuttutassat amerlineqarput, ukiaaneranilu tuttunniarneq sivikillineqarluni.
Tuttut akornusersorneqannginnissaat pillugu ukiakkut piniarneqartarnerat sivikillineqarpoq, ukiuuneranili tuttunniarnermut tamanna naapertuutinngitsoq, Nuummi sunngiffimmi piniartartut, Facebookimi 595-inik ilaasortallit oqaatigaat:
- Siorna piniarnermut ammaassileramik mianersorneq siunertaralugu aalajangerneqarpoq ikinnerusunik pisaqartoqarsinnaasoq, taavalu taanna patsisigalugu sooq taava ukiakkut ammaassisoqassava? Tuttut ikinnerulersimappata sooq taava ukiakkut taama piniartoqarsinnaanissaanut ammaassineqassava?, Salik Hard, Nuummi sunngiffimmi piniartartuneersoq, taama aperivoq.
Tuttunniartarnerup taama aqunneqarnera pissusissamisuunngitsoq, Michael Rosing, Demokraatineersoq, isumaqarpoq. Tuttut akornusersorneqassanngippata, ikiliartunnginnissaallu qulakkeerniarneqassappat taava ukiuunerani piniarneqaratik ukiakkut piniarneqartariaqartut Michael Rosing isumaqarpoq:
- Ukiukkut piniartoqarsinnaanissaa pinnagu ukiakkut piniartoqarsinnaanissaa ajornannginnerutinneqartariaqarpoq, ukiukkummi piniartoqarsinnaappat tuttunut akornutaassaaq, amerlassusaannullu aamma innarliisinnaalluni, Michael Rosing, Demokraatinersoq, oqarpoq.
Tuttut ukiakkut piniarneqartarnerisa killilersornerisigut, saniatigullu ukiukkut piniarneqarsinnaalernissaat tuttoqassutsimut tamanna qanoq ilinikkut illersorneqarsinnaanersoq, KNR-ip Aalisarnermut piniarnermullu naalakkersuisumut Hans Enoksenimut apeqqutigigaluarpaa, Aalisarnermulli piniarnermullu naalakkersuisoqarfimmit suli akissuteqartoqanngilaq.
Pinngortitaleriffimmi biologit tuttutassiissutit pillugit tusarniaasoqarnerani akissutaat qimerlualaraanni takuneqarsinnaavoq sumiiffinni assigiinngitsuni tuttutassiissutit amerlineqartariaqartut, tuttut taamaalinikkut amerlassutsimikkut killilersimaarneqarsinnaaniassammata. Taassuma saniatigut biologit inassutigaat ukiukkut piniarsinnaaneq killilersimaarneqartariaqartoq.
AAMMA ATUARUK Piniarnermut Siunnersuisoqatigiit tusarniarneqanngillat