Ukiukkut tuttunniarneq Piniarnermut Siunnersuisoqatigiit tusarniarneqanngillat

Pisassiissutit allanngortinneqarpata, inatsisit naapertorlugit , piniarnermut siunnersuisoqatigiit kattuffiit oqartussaaffiillu assigiinngitsut tusarniarneqassapput , tamannalu uani pisimanngilaq.

Piniarnermullu Peqatigiiffiit saaffiginnissutaat aallaavigalugu, ukiukkut tuttutassat amerlineqarput.

Pisassat annertusineqarnerat pillugu pinngortitaleriffik naalakkersuisunit ilisimatinneqarpoq.

Tamannali naammaginartinneqanngilaq. Piniarnermut Siunnersuisoqatigiit tusarniarneqarsimannginnertik naammaginngilaat.

AAMMA ATUARUK Ukiuunerani tuttunniarnerup sivitsuiffigineqarnera WWF-ip isornartorsioraa

- Piniarnermut Siunnersuisoqatigiinni piniartut illersugassaraagut, aamma inuussutissarsiorneranni tapersersugassaraagut, kisianni oqartussaasunit qarsupiinnarneqarluta Siunnersuisoqatigiinnit tusarniarneqaqqaartarnissarput kissaatigissavara, Piniarnermut siunnersuisoqatigiit siulittaasuat Lars Heilmann taama oqarpoq.

AAMMA ATUARUK Sermersooq ukiuunerani aavarnissamut makitsilersoq

Pinngortitaq pillugu nunarsuaq tamakkerlugu suliniaqatigiiffiup WWF-ip Kalaallit Nunaanni siulittaasua Kaare Winther Hansen oqarpoq allannguutit oqaaseqarfigineqarnissaannut periarfissaqarsimannginnera ajornartorsiutaasimasoq.

- Namminersorlutik Oqartussat tusarniaaqqaaratik taamannak allanngortitsinerat makitasaarniakujulaarneruvoq, Kaare Winther Hansen oqarpoq.

Hans Enoksenip aalajangiusimavaa, kattuffiit piniarnermullu siunnersuisoqatigiit tusarniaqqaarnagit pisassiissutit Naalakkersuisunit allanngortinneqarsinnaanerinik.

- Naalakkersuisup nammineerluni aalajangiinissaanut periarfissaareerpoq, uanilu takuarput pinngortitaq qanoq imaannaanngitsigisoq aperujussuarneratigut tuttut nerisinnaanerat aarleqqutigineqarpoq.

Inatsit naapertorlugu Naalakkersuisut pisussaatitaapput pisassiissutit allannguutaanik piniarnermut siunnersuisoqatigiit tusarniassallugit.

Piniarnermut siunnersuisoqatigiit kattuffiillu kingullermik aasaq tusarniaaffigineqarput, tamatumalu kingorna umimmattassat tuttutassallu amerlineqangaatsiarput.

AAMMA ATUARUK Ukiuunerani tuttunniarsinnaaneq Pinngortitaleriffiup innersuussutiginngilaa

Ukiukkut tuttunniarnerup ammaanneqarnissaanut Pinngortitaleriffiup ilisimatinneqarnerminut atatillugu innersuussutigineqarpoq, uumasut uippakajaartinneqassanngitsut taamaattumillu ukiukkut tuttunniarneq sivitsorneqarani sivikillineqartariaqartoq.

Pinngortitaleriffiup taama innersuussinerata kingorna, ukiukkut tuttunniarnerup sivitsorneqarnissaa Hans Enoksenip politikkikkut aalajangiiffigaa.