Ukiuunerani tuttunniarnerup sivitsuiffigineqarnera WWF-ip isornartorsioraa
Decembarimi nalunaarutigineqartumit ukiukkut tuttunniarsinnaanerulerneq Hans Enoksenimit aalajangerneqarpoq.
Tuttulli amerlanerit ukiukkut pisarineqarnissaat silatusaarnerunngitsuusoq isumaqartoqarpoq.
- Tuttut Nunatsinniittunut isumalluutaapput, ukiukkullu pisarineqassappata, taava isumalluutimit iluaqutigisinnaagaluakkagut pinngitsuussavagut, pinngortitaq pillugu nunarsuaq tamakkerlugu suliniaqatigiiffimmeersoq, Kaare Winter Hansen oqarpoq.
Ilumittunik piniarnissaq WWF-ip isornartorsioraa
Tuttut ukiukkut iluminneranni piniarneqassagunik piaqqisussaanngitsut, allinavianngitsut uippakajaalissasut, tamatumalu kingunerisaanik tuttut ukiukkut toqusartut amerlissasut, Kaare Winter Hansen oqarpoq, nangillunilu oqarluni tuttut ukiukkut pisarineqassappata imminut akilersinnaanngitsoq.
- Taava neqerujussuaq maanngaannassaaq, Kaare Winter Hansen oqarpoq.
Taamaammat ukiaanerani tuttuttassiissutit amerlineqarnissaat suliniaqatigiiffiup siunnersuutigaa.
AAMMA ATUARUK KNAPK: God mening og begrænse rensdyrkvoter
AAMMA ATUARUK WWF: Skyd flere rensdyr
- Atorluaaneq eqqarsaatigalugu ukiukkut tuttunniarneq ukiakkut tuttunniarnermut sanilliullugu isumassarsiaalluanngilaq, Hansen oqarpoq.
Sunngiffimmi piniartut sumiiffimmi tassani tuttuttassiissutaat ukiaq ikilineqariarlutik ukiukkut tuttunniarsinnaanerulersitsisoqarnera paatsuunganartoqartoq suliniaqatigiiffimmit isumaqarput.
- Nalunaarutit imminnut assortuupput, Kaare Winter Hansen oqarpoq.
Akiata tuttunniarfigineqarsinnaalernissaa ajuusaarutigaa
Kiisalu Akia-Maniitsup ukiukkut tuttunniarfigineqarsinnaalernissaa suliniaqatigiiffiup ajuusaarutigaa. Akia-Maniitsoq tuttunut ukiukkut pingaaruteqartutut Pinngortitaleriffimmit siornatigut taaneqarpoq, 2009-miillu ukiukkut tuttunniarfigineqarneq ajorluni.
AAMMA ATUARUK Naalakkersuisut lytter til rensdyr-kritik
AAMMA ATUARUK Tuttutassat pillugit Naalakkersuisut paatsuugaqartut
- Sumiiffimmi ukiukkut tuttunniartitsineq kukkunerulluinnassasoraarput, Pinngortitaq pillugu nunarsuaq tamakkerlugu suliniaqatigiiffimmeersoq, Kaare Winter Hansen oqarpoq.
Naalakkersuisoqarfik ukiukkut tuttuttassiissutinik decembarip ulluisa 15-ianni nalunaarutigineqarmata Akia-Maniitsoq ilaatinneqanngikkaluarpoq.
Hans Enoksenilli sumiiffimmi 150-inik tuttuttassiisoqarneranik piniarfinnilu allani tuttuttassiissutit 100-nit 150-inut amerlineqartut tusagassiuutinut nalunaarummi nutaami nalunaarutigaa.
