WWF: Tuttut amerlanerusut pisarineqartariaqarput
Sunngiffimmi pinialuttartut tuttunniarfigisinaasaat killilersorneqassasut pisassaalllu tallimanut ikilisinneqassasut Naalakkersuisut siunnersuuteqarput.
Tuttut ikiliartornerat pissutigalugu mianersornissaq tunngavigalugu pisassiissutinik siunnersuuteqartoqartoq Naalakkersuisut siunnersuuteqarnerminni tunngavilersuutigaat.
Nuup eqqaani tuttunik kisitsineq kingulleq pivoq 2012-imi taamaattumillu nutaanik malittarisassiornissamut tuttut qanoq amerlatiginersut ilisimaqqissaarneqarnerani.
WWF-imit ernummatigineqarpoq nutaamik malittarisassiortoqarpat tuttut amerlassusiat innarlerneqassasoq.
- Tamatta isumaqatigiilluta oqarpugut, tuttut qanoq amerlatiginersut ilisimaneqanngippat tuttutunik pisissiissutit ikilineqassanngillat, taamaaliortoqarpat tuttut ulorinartorsiortinneqassapput. Kaare Winther WWF-ip Kalaallit Nunaanni sinniisua oqarpoq.
Aamma atuaruk Tuttut pisassiissutigineqartussat isornartoqartinneqarput
- Killormut eqqarsartoqartoq isumaqartoqarsinnaavoq, tuttut amerlavallaalerunik neriniarfissaat ajornartorsiutaalissaaq. - Tuttut amerlavallaarunik nerisartagaat naammagunnaassapput tuttullu nungutaanissaminnut ulorianartorsiulissapput, Kaare Winther Hansen oqarpoq.
Inuussutissarsiutigalugu piniartut kattuffiata KNAPK-ip Naalakkersuisut siunnersuutaat iluarisimaarpaat.
Naalakkersuisut tuttut ikiliartornerannik isumakuluuteqarnerat KNAPK-mit pineqanngilaq, kisiannili sunngiffimmi pinialuttartut tuttuttaminnik tuniniaasarnerat tikkuarpaat inuussutissarsiutigalugu piniartunut KNAPK-mi ilaasortanut unammillernertut taallugu.
Aamma atuaruk KNAPK: Tuttutassat ikilisinneqarnerat isumatusaarneruvoq
WWF aningaasatigut iluanaaruteqarnissaq soqutigisarinngilaat killormuanillu Nuup eqqaani tuttutassat amerlaneqarnisaat avartarnerullu sivitsorneqarnissaa siunnersuutigalugu.
- Qanoq iliuuseqartoqassappat avaartarnermut piffissatitaasoq sivitsortariaqarpoq aamma sunngiffimmi pinialuttartut imaluunniit inuussutissarsiutigalugu piniartut pissasaat ikilisinneqassanngillat, taamaaliortoqarpammi sumiiffimmi pineqartumi tuttut amerlanerulernissaannut periarfissaqalissammat, Kaare Winther Hansen oqarpoq.
Tuttut kisinneqarsimatinnagit qanoq amerlatiginersut nalilersorneqarsinnaanngilaq, Kaare Winther Hansenimmi sunngiffimmi pinialuttartunik inuussutissarsiutigalugu piniartunik oqaloqateqaraangami erseqqissumik akissutisisarpoq.
- Isumaqatigiillutik tamarmik oqarput tuttut ikileriarsimanngitsut, ilisimasarpulli tassaavoq qanoq amerlatiginersut ilisimaneqanngimmat kingullermik 2012-mi kisinnneqarsimammata.
Pinngortitaleriffik kingullermik tuttunik kisitsivoq 2012-mi taamaattumillu pisassiissutinik siunnersuuteqanngilaq, Aalisarnermut Piniarnermut nunalerimullu naalakkersuisoqarfik nalunaarpoq.
Pinngortitaleriffiup tuttunik umimmannillu pisassiisarnermi nunat tamat suleqatigisartagaasa innersuussutigaat, tuttunik umimmannillu kisistsisarnerit ukiut pingasut qaanngiukkaangata kisitsisoqartassasoq, Christine Cuyler Pinnngortitaleriffik taama oqarpoq
Christine Cuylerip erseqqisaatigaa, tuttunik kisitsinissamut Namminersorlutik Oqartussat aningaasaaliisimanngimata kisitsisoqarsinnaanngitsoq.
Aamma atuaruk Arnaq inuusuttoq tuttup kumaanik tunillanneqartoq