Krusep danskit aalisarnermut oqartussaajunnaarsikkusuppai
Kalaallit Savalimmiormiullu naalakkersuisuisa naalagaaffeqatigiinnerup aaqqissuunneqarnera pillugu nutaamik isumaqatigiinniartoqarnissaa kissaatigaat, nunat taakkua marluk taamaaliornikkut aalisarnikkut oqartussaassuseqarnerunerunerat anguneqassammat.
Kalaallit Nunaat aamma Savalimmiut avaleraasartuunik, tun-inik aamma aalisakkanik kulmule-nik taaguuteqartunik amerlanerusunik aalisartalerusupput. Taama kissaateqartut aamma tassaapput nunat EU-mut ilaasortat kiisalu nunat Aasiamiittut.
Tamanna ajornartorsiortaavoq, Danmarkimmi EU-mut ilaasortaatilluni, nunat pingasut naalagaaffeqatigiit sinnerlugit nunat tamalaat akornanni ataatsimiinnerni oqaaseqartartuunissani aalajangiusimavaa.
Nutaamik eqqarsartoqartariaqalerpoq, Kalaallit Nunaannit taama oqartoqarpoq.
- Soqutigisat assigiinngitsuusarneri naammattoortarpavut taakkulu nunat akornanni aporaatitsisarlutik, Aalisarnermut Naalakkersuisoq Karl Kristian Kruse aviisimi politikenimi apersorneqarluni taama oqarpoq.
Aamma atuaruk Tunngaviusumik inatsiseqalernissarput danskit naalakkersuisuisa killilimmik tapersersorpaat
Nunat naalagaaffeqatigiinni ilaasut piffissami qaninnermi ataatsimiinnissaanni naalagaaffeqatigiinni suleqatigiinnerup nalilersoqqinneqarnissaa, Naalakkersuisut siunnersuutiginiaraat, Karl Kristian Krusep aamma oqaatigaa.
Nunat naalagaaffeqatigiinnut ilaasut pingasut sinnerlugit Danmarkip oqaaseqartartuunissaanik Danmarkimi naalakkersuisuusartut allanngortinniarnagu oqartarput. Tamanna inatsimmut tunngaviusumut naapertuutinngitsutut nalilerneqarluni.
