Krusep Grønlandsbanken isornartorsioraa
Aningaaseriviup taama aalajangernermigut inunnik assigiinngisitsivoq, Karl Kristian Kruse taama isumaqarpoq, taannna Siumumi politikikkut oqaaseqartartuuvoq.
Karl Kristian Krusep aningaaseriviup aalajangernera, inuiaqatigiinnut annertuumik innimiilliornerusoq imalu allappoq:
-Siumumiit erseqqissaatigissavarput nunatsinni innuttaasut naligiimmik pineqarnissaat sullinneqarnissaat periarfissaqarnissaallu Siumumit pingaartilluinnaratsigu tunngavigalugulu, Karl Kristian Kruse allappoq.
AAMMA ATUARUK Grønlandsbanken umiatsiaraasortunut aningaasaliisarunnaartoq
Kruse taama isornartorsiuteqarpoq aningaaserivik Grønlandsbanken ataasinngornermi nalunaaruteqarmat, umiatsiaararsortut aalisariutiminnik nutarterinissaannut nutaanillu pisinissaannut aningaasaliisarunnaarniarluni.
Aningaaserivimmiit nalilerneqarpoq, umiatsiaararsorlutik aalisartut aningaasarsiornikkut piujuaannartitsinissamullu ingerlasinnaanngitsut.
Aningaaseriviup pisortaata aalajangernermi nassuiaatigivaa, ernummatigineqarmat aalisartut aningaaserivimmut taarsigassarsiatik taarsersinnaassanngimmatigit ungasinnerusorlu eqqarsaatigalugu aalisarnermik inuussutissarsiuteqarsinnaanerat qularnarmat.
Umiatsiaararsorlutik aalisartut ukiuni kingullerni amerleriarujussuarsimapput, pisassiissutigineqartartullu Pinngortitaleriffimmit innersuussutigineqartunit qaangerneqartuaannarlutik.
Saarullinnik tunitsivimmut tunisisarneq 37 procentimik appartoq
Pinngortitaleriffimmit ukiuni arlaqalersuni mianersoqqussutigineqartarpoq qalerallit milligaluttuinnarmata, saarulliillu kitaani tunineqartartut 2016-miillli 37procentinik ikileriarsimammata.
Karl Kristian Kruse isumaqarpoq, Grønlandsbankenip aalajangernera aalisarnikkut ingerlatseqatigiiffissuit anginerusunik aalisariutitaarnerannik kinguneqassasoq.
AAMMA ATUARUK Umiatsiaararsortoq: Bankip killiliinera siusinaarluni iliuuseqarneruvoq
- Siumumiit pingaartittuaannarparput qulakkeersimassallugu inuinaqatigiinni aalasarnermik inuussutissarsiuteqarnermi inuit sapinngisamik amerlanerpaat periarfissaqarnissaat, matumalu mattussinerup kingunerissavaa inuiaqatigiit pisuussutaasa inunnik ikiligaluttuinnartunit iluanaarutaanerat. Kruse taama allappoq.
GrønlandsBanken kaammattorparput aalajangernini nalilersorluaqqullugu aammalu Siumumiit BankNordik nersualaarparput inuiaqatigiit ataatsimut isigalugit naligiittullu isigalugit ingerlatsimmat, Karl Kristian Kruse Siumut politikkikkut oqaaseqartartua taama allappoq.
