Tillie Martinussen: Atornerluisoq pinnagu atornerliusarneq isornartorsiortigu
Tillie Martinussenip kortimik benzinasiniutissamik atornerluisoqarsimanersoq paragraf 37 atorlugu apeqquteqaateqarnerata kingorna Doris J. Jensenip benzinasiniutissaa pillugu suliaq tamanit ilisimaneqalerpoq.
Doris J. Jensen Naalakkersuisutut maanna tunuareerpoq, illuatungiliuttullu kukkunersiuinermut ataatsimiititaliap suliamut inaarutaasumik aalajangiissuteqarnissaa utaqqinagu tatiginnikkunnaarnermik taasiniarnerlutik nalunaaruteqarnerat Kielsenip pakatsissutigaa.
AAMMA ATUARUK Siumup naammaginanngitsumik iliuuseqarnera Dorisip tunuartariaqarneranik kinguneqarpoq
Illuatungiliuttut siuttuata Inuit Ataqatigiinneersup Sara Olsvigip Kim Kielsen piffissaagallartillugu iliuuseqarsimasussaasariaqarsoraa. Isornartorsiuinerilli atornerluineq pillugu suliamut sammitinneqartariaqartut Tillie Martinussen isumaqarpoq.
- Suliami matumani isornartorsiuisoqassappat pisortat aningaasaataannik peqqissaarussinnginnermut isornartorsiuisoqartariaqartoq isumaqarpunga, Tillie Martinussen oqarpoq, ammasuunissamullu inatsimmik kissaateqarnini oqaatigeqqillugu.
Takussutissat tamarmik saqqummiunneqartartuuppata suliat imaattut pinaveersaarneqarsinnaassagaluartut, Tillie Martinussen isumaqarpoq.
AAMMA ATUARUK Atassut benzinasiutissamut tunngatillugu malittarisassanik erseqqinnerusunik ujartuisoq
- Tamanut ammaneq aqqutissaasoq ersersinneqaqqiinnarpoq.
Inuit politikerillu akornanni tatigeqatigiinnerup qulakkeernissaa pingaartuusoq, Martinnusen oqarpoq.
Kim Kielsenilli suliaq qanga qanorlu qisuariarfigisimassagaluarneraa Suleqatigiissitsisut siulittaasuata tulliata oqaaseqarfigerusunngilaa.
AAMMA ATUARUK Dorisimut tatiginninngittoqarnera Kim Kielsenip pakatsissutigaa
- Pineqartoq eqqortumik pineqarnersoq Siumup nammineerluni nalililersusaavaa. Inuit ataasikkaat eqqoriaasaqattaarnerillu iserfiginianngilakka. Aamma ilisimanngilara pisoq pillugu qanoq ilisimasaqartigisoqarnersoq. Nalulluinnaqqissaarpara, Martinussen oqarpoq.
Taamaakkaluartorli Doris J. Jensenip aqqut eqqortoq qineraa isumaqarpoq.
- Kingunitut nammineerluni toqqaagaa eqqortuuvoq, Kim Kielsenilli suliami matumani Naalakkersuisuutitaminik annaasaqarnini ajuusaarutigaa paasisinnaavara, Tillie Martinussen oqarpoq.
AAMMA ATUARUK Kim Kielsenip nammineq iliuuserisani pakatsissutigisariaqaraluarpai
