Inuit Ataqatigiit: Kim Kielsenip nammineq iliuuserisani pakatsissutigisariaqaraluarpai

Nunatsinni politikerit akornanni pisortat aningaasaataannik atornerluisoqaqqinnera, taamatuttaarlu pisumik ajornartorsiutaasumik nammineq isumaginninnini Kim Kielsenip pakatsissutigisariaqaraluarpaa, partiimi illuatungiliuttumi Inuit Ataqatigiinni siulittaasoq taama isumaqarpoq.
oktobarip 18-at 2018 11:17
Nutserisoq Simon Uldum

- Illuatingiliuttut pakatsissutiginagit nammineq iliuuserisat pakatsissutigineqartariaqaraluarput, Sara Olsvig taama allappoq.

Sara Olsvig, Inuit Ataqatigiit tusagassiorfinnut nalunaarutaanni nassuiaavoq kortimik benzinasiutissamik atornerluisoqarsimanera paasineqarmat nammineq taamanilu Naalakkersuisuusut pisoq pillugu nipangersimasussaatitaanermik meqqilersukkamik ilisimatinneqarsimallutik.

Ullunili kingullerni passissutissat tamanut saqqummiunneqartut pissutigalugit Inuit Ataqatigiit aatsaat taama qisuariaateqarput, Sara Olsvig allappoq.

AAMMA ATUARUK Dorisimut tatiginninngittoqarnera Kim Kielsenip pakatsissutigaa

- Deloittep nalunaarusiaata quppernernik sisamanik annertussusillip Inuit Ataqatigiit Doris J. Jensenip Naalakkersuisutut biilit orsernerannut akiliissutigisinnaasaanik korteqartitaanermini illersorneqarsinnaanngitsumik atuisoqartarsimaneranik paasissutissiinera naliliinitsinnut aallaaviulluinnarsimavoq.

Inuit Ataqatigiit isumaqarput atornerluisoqarsimanerani 2017-imi paasineqarmat Kim Kielsen aamma taamatut naliliisimasariaqaraluartoq. Taarsiulluguli, Doris J. Jensen Naalakkersuisuni maloriarluni ilaasortanngortippaa.

AAMMA ATUARUK Doris J. Jensen Naalakkersuisunit tunuarpoq

Suliamut tunngatillugu paasissutissat naapertorlugit, Doris J. Jensenip inoqutigisimasaa kortimik atornerluisuuvoq.

Naalakkersuisut siulittaasuat pisoq pillugu KNR-imit oqaaseqartinniarsaraarput.