Dorisimut tatiginninngittoqarnera Kim Kielsenip pakatsissutigaa
- Partiit illuatungiliuttut tamat oqartussaaqataanerat ataqqinagu pissusilersornerat pakatsissutigaara, qanorpiarlu pisoqarsimanersoq pillugu kukkunersiuinermut ataatsimiititaliap sulinera utaqqimaaqqaarnianngimmassuk pakatsissutigaara.
Allattoq Mads Lynge
oktobarip 18-at 2018 07:30
Naalakkersuisut siulittaasuat Kim Kielsen, inatsisartuni ippassaq pisut, Doris J. Jensenillu naalakkersuisutut tunuarnerannik kinguneqartut pillugit, Sermitsiaq.AG-mut taama oqarpoq.
Kukkunersiuisut nalunaarusiaat 2017-imi tunniunneqarmat suliaq tamanut saqqummiunnagu, Inatsisartut Kukkunersiuinermut Ataatsimiititaliaannut tunniummagu, Kim Kielsenip peqqissimissutiginngilaa.
- Suliaq pillugu ilisimatinneqarama suliap taamatut ingerlateqqinneqarnissaa pissusissamisoortutut isigaara. Tassa Kukkunersiuinermut Ataatsimiititaliap isumaa, naalakkersuisut siulittaasuat Sermits.AG-mut oqarpoq.
Kina Doris J. Jensenimut kingoraartaassanersoq suli nalunaarutigisinnaanagu, Kim Kielsenip ilangullugu ilisimatitsissutigaa.
