Isornartorsiuineq: Taksøep ataatsimiitsitaliaani kalaallit amigaataapput

Inuit Ataqatigiit partiilu Alternativet aviisimi Berlingskemi taama allaaserisaqarput.
Taksøe-p nalunaarusiaa ataasinngorpat saqqummissaaq. Taksøe naalakkersuisunit Venstreneersuusunit suliakkiissutigineqartoq, nalunaarisiaalu Danmarkip nunanut allanut tunngasunut politikkissaanut innersuussuterpassuarnik  imaqarpoq.

Tassanilu Nunarput Issittorlu pingaaaruteqartumik inissisimassasut oqaatigineqarpoq. Nalunaarusiarli kalaallinit ilusilersueqataaffigineqannginnera, partiinit marlunnit isornartorsiorneqarpoq.

- Naalagaaffeqatigiit nunanut allanut politikkianni Kalaallit Nunaat pineqartillugu Namminersorlutik Oqartussat peqataatinneqarnissartik qangali  ilungersuutigisigaat. Taava sooruna Danmakrip Nunanut allanut politikkiata ilusilersorneqarnerani Kalaallit Nunaannullu tulluarsarneruneqarnerani peqataatinneqanngitsut? Tamanna paasiuminaatsiparput, partiit allapput.

Aamma atuaruk Atorfilittaq: Issittoq Danmarkip nunanut allanut tunngasunut politikkianut ilaatinneqarnerusariaqarpoq

Issittumi innuttaasut uukkatarineqarnerunissaat, immakkut angallannermi namminneq kajumissutsiminnik upalungaarsimasunik pilersitsisoqarnissaa, Ruslandillu Issittumi akeqqatut tusagassiuutinit saqqummersinneqartarunnaariartornissaa Inuit Ataqatigiit Alternativetillu ilaatigut ujartorpaat.

Taamatulli isornartorsiuineq kukkusuusoq, Peter Taksøe-Jensen Berlingskemut oqarpoq.

Malinnaatitaasuni paasisimasalinni kalaallinik peqataasoqanngikkaluartoq, Issittoq pillugu tunngaviusumik suliaqarnermi Kalaallit Nunaannit Savalimmiuniillu qaaqqusaasoqarsimasoq, Taksøe-Jensen oqarpoq.

Isornartorsiuinerit Nunanut allanut Nunatsinni pisortaqarfimmit aamma akerlilerneqarput.

- Nalunaarusiortut ataanni suleqatigiititami sulinermi peqataavugut, eqqarsaatitsinnillu apuutaqarsinnaareerluta. Taava nalunaarusuami qanoq allattoqarsimanersoq takujumaarparput, nunanut allanut pisortaqarfimmi pisortaq, Kai Holst Andersen oqarpoq.