Ilisimatooq: Kræftimik nappaateqartut aningaasaqarnikkut ilaatigut ajornartorsiuteqarput
- Qanigisaasut paasitinneqarnissartik assut amigaatigisarpaat. Imaakkami: napparsimasoq kisimiilluni Nuummut Danmarkimulluunniit nakorsartikkiartortarpoq, taannalu aallaavigalugu qanigisaasut paasitinneqarnissartik malinnaatinneqarnissartillu amigaatigisarpaat, peqqissaasoq Mikaela Augustussen taama oqarpoq.
Kræftimik nappaateqartut pillugit qanigisaasut paasitinneqarlutillu malinnaatinneqarnissaannut ajornartorsiutit saniatigut kræftimik nappaateqartut aningaasatigut aamma ajornartorsiuteqartut paasivara, qanigisaasunullu ungasissumiinnertik pillugu ajornartorsiuteqalertarnerat aamma tikkuarlugu.
Kræftimik nappaateqartut nappaamminnik taamaallaat ernumassuteqarneq ajortut Mikaela Augustussenip ilisimatuutut misissuinermi paasivaa, malitsigisassaallu kinguleriiaat aamma ernumassutaasartut:
- Peqqinnissaqarfiup sulinera uani assut sammivara, kisianni aamma kommunip sullissinera aamma sammivara, taakkualu suleqatigiinnerusinnaanerat. Peqqinnissaqarfiup kommunillu suleqatigiinnerunissaat assut kissaatiginarpoq, Mikaela Augustussen oqarpoq, nangillunilu:
- Napparsimasut pisariaqartitaat assigiinngitsorujussuupput, taamaammat sullissinerup, suleqatigiinnikkut pitsaanerusoq anguneqarnissaa assut kissaatiginarpoq, peqqissaasoq oqarpoq.
Kræftimik nappaateqartut katsorsartinnertik ilaatigut pissutigalugu sulisinnaassusiat innarlerneqarsinnaavoq. Tamanna pillugu peqqinnissaqarfik kommunillu akornanni suleqatigiinnerusoqarsinnaanera Mikaela Augustussenip misissuinermini ilaatigut aamma paasivaa:
AAMMA ATUARUK Inalugarsuarmikkut kræfteqalersartut amerliartortut
Naatsumik oqaatigalugu Mikaela Augustussenip nunatsinni kræftertunut pitsanngorsaataasinnaasoq ilimanarluartoq paasivaa:
- Kræftimik nappaateqartut sullinneqarnerat ilisimatuussutsikkut maanna misissoreerpara, peqqinnissaqarfimmilu sulisut maanna taava apeqqutaaginnalerput, peqqissaasutut ilinniarsimasoq, Mikaela Augustussen, Danmarkimi nunatsinnilu kalaallit kræftimik nappaateqartut peqqissarnerannik suliaqarsimasoq peqqissaasunilu siulliulluni ph.d-liamik illersuisuisoq taama oqarpoq.
Mikaela Augustussenip Ilisimatusarfimmi septembarimi ukiumoortumik nalliuttorsiornermi ph.d-ni pisortatigoortumik tigussavaa.
Suliniut Danmarkimi Kræftens Bekæmpelsimit, Peqqissutsimut Naalakkersuisoqarfimmi ilinniaqqinnermut aningaasaliissutinit kiisalu ilisimatusarnerup siuarsarneqarnissaanut Namminersorlutik Oqartussat aningaasaliissutaannit aningaasalersorneqarpoq.
