Korea Avannarleq Korea Kujallermut killeqarfiup nalaani sakkutuuliillunilu sakkussianik inissiisoq
Korea Avannarliup Korea Kujalliullu sakkussaqarniarnikkut isumaqatigiissutaata sapaatit akunnerata siuliani atorunnaarsinneqareersorlu, Korea Avannarleq Korea Kujallermut killeqarfiup nalaani sakkutuuliillunilu sakkussianik inissiivoq.
Korea Kujallermi nutaarsiassaqartitsivik Yonhap taama allappoq.
Nunat marluk taakku akornanni najummassimanartorsiornerit annikillisarniarlugit sakkussaqarniarnikkut annikillisaasoqarnissaanik 2018-imi isumaqatigiissusiortoqarpoq, nunat marluk taakku akornanni killeqarfiup sakkutuulersugassaajunnaarneranik ilaatigut siunertaqarluni.
Korea Kujalliup Korea Avannarliullu akornanni killeqarfiup nalaani nuna 4 kilometeritut isorartutigisoq, tassa killeqarfimmit nunap qiterpasissuata nalaanut 2 kilometeritut isorartutigisoq, DMZ-imik taaguutilik, sakkutuulersorfigineqaqqusaanngikkaluarpoq.
Nunallu immikkoortuani tassani timmisartunik aammma qulaavaasoqaqqusaanngilaq, illersornissakkullu assigiinngitsutigut iliuuseqartoqaqqusaanani.
Korea Avannarliup siuttuata, Kim Jong-unip, Korea Kujalliullu taamanikkut præsidenterisaata, Moon Jae-inip, isumaqatigiissut atsiorpaat.
