Koranimik ikuallaanerit inerteqqutiginissaat killiligaanani oqaaseqarsinnaanermut akuliuneruvoq
Muslimit illernartuutitaannik koranimik nunat assigiinngitsut Danmarkimi aallartitaqarfiisa silataanni ikuallaasarnerit inerteqqutaalernissaat, Danmarkimi naalakkersuisunit kissaatigineqarpoq, partiillu assigiinngitsut siunnersuut illuatungilerpaat.
Inuit ikittuinnaat koranimik ikuallaasarnerat pissutigiinnarlugu inerteqquteqalernissaq tapersersorsinnaanagu, Det Konservative Folkepartip siulittaasuata Søren Pape Poulsenip Facebookikkut allaaseraa.
- Immitsinnut aperisariaqarpugut: Sunaana sukataarutigigipput? Killilersugaanani eqqarsaatersorsinnaaneq, oqaaseqarsinnaaneq assigisaallu uanga sukataarutigaara. Isumaqatiginninngikkuma killiligaananga oqaaseqarsinnaatitaanissara sukataarutigaara. Lars Løkke naalakkersuisullu taama isumaqarpasinngillat, Pape Poulsen ilaatigut allappoq.
Tamat oqartussaaqataanerat Danmarkimi naalakkersuisut killilersorniaraat, Dansk Folkepartip siulittaasuata Morten Messerschmidtip oqaatigaa.
Taannalu Danmarksdemokraternep siulittaasuanit Inger Støjbergimit tapersersorneqarpoq.
- Tamat oqartussaaqataanerat aalajaalluta attatissavarput, inuiaqatigiimmi tamanna tunngavigaat tamannalu ajalusoortinneqassanngilaq, Inger Støjberg Facebookikkut allappoq.
SF, Enhedslisten aamma De Radikale Venstre, Danmarkimi naalakkersuisut siunnersuutaat pillugu suli oqaaseqanngillat.
Dansk Industrip (DI) pisortaanerata Lars Sandahlip Twitterikkut allaaserisaa naapertorlugu koraninik aallartitaqarfiit silataanni ikuallaasoqartarneranik naalakkersuisut unitsitsiniarnerat isumatusaarneruvoq.
Suliffeqarfippassuimmi koraninik Danmarkimi ikuallaasoqartarnera pissutigalugu nunani muslimeqarfiusuni tunisaqarnermikkut annaasaqartartut Sandahlip oqaatigaa.
Danmarkip nunanut allanut tunngasunut ministeria Lars Løkke Rasmussen, Folketingimi partiit nunanut allanut tunngasunut oqaaseqartartuinut pissutsit pillugit Danmarkimi ullumi ullaap tungaani nalunaaqutaq qulinngortoq ilisimatitsissuteqarpoq.