Kommune siuliunnaarallartitsinerminut: Innuttaasut uatsinnit tusartariaqaramikku

Innuttaasut suliunnaarallartitsinermut tunngatillugu kommunimit, tusagassiuutiniunngitsorlu, ilisimatinneqarusussimapput.

Taama Kommune Qeqertalik Kangaatsiami inunnik isumaginnittoqarfimmi sulisunik pingasunik ukioq manna januaarimi suliunnaarallartitsigallarnermi kingorna innuttaasunik ataatsimiititsimanerminut tunngavilersuuteqarpoq. Kommuni suliunnaarallartitsinerminut atatillugu aamma tusagassiuutinut nalunaaruteqarpoq.

Tamannali nikanarsaaneruvoq. Atorfillit pineqartut pingasut kattuffiat, Atorfillit Kattuffiat, isumaqarpoq.

AAMMA ATUARUK AK: Kommune Qeqertallip ilaasortavut nikanarsarpai

Kommunimi suliunnaarallartinneqartuni pingasuusuni marlunnut soraarnermi immikkut ajunngitsorsiassanik kingusinnerusukkut tunniussaqartariaqarsimavoq.

Kommune Qeqertalimmiilli Atorfillit Kattuffiata nikanarsaasoqarsimaneraalluni suliassanngortitsinissaminik isumaliuteqarnera KNR-imut oqaaseqarfigineqarusunngilaq. Taarsiulluguli tusagassiuutinut nalunaarut, Sermitsiaq.AG-p sapaatip akunnerani kingullermi sammisamut tunngatillugu allaaserinninneranut tunngatinneqartoq, innersuussutigineqarpoq.

- Allaaserisat inunnut ataasiakkaanut tunngasut oqaaseqarfigisinnaanngilagut, Kommune Qeqertalimmi pisortaanerugallartoq, Thomas Holm Jensen, allappoq.

AAMMA ATUARUK Kangaatsiami sulisut arlallit Kommune Qeqertalimmit suliunnaarallartinneqarput

Thomas Holm Jensen nangilluni allappoq kommunimut pingaaruteqarsimasoq innuttaasut suliunnaarsitsigallarneq pillugu kommunimit, tusagassiuutikkuunngitsorlu, tusarlerneqarnissaat.

Kommune Qeqertalimmiillu erseqqissaatigineqarpoq kommunimut pingaaruteqartoq inatsisit atuuttut malillugit kiisalu meeqqat pineqartut eqqarsaatigalugit suliassat naammassineqartarnissaat.

Atorfillit pineqartut pingajuata suliunnaarallartinneqarneranut suliassaartaa suli naammassineqanngilaq. Taanna eqqartuussivikkut naammassineqassaaq Atorfillit Kattuffiat Kommune Qeqertalillu suliami isumaqatigiinngissuteqarmata.

AAMMA ATUARUK Meeqqat pillugit sullissinermi akuersaaruminaattunik naammattuugaqarsimavugut