Qeqertalik Meeqqat pillugit sullissinermi akuersaaruminaattunik naammattuugaqarsimavugut

Ukiup 2018-ip naajartornerani sammisanik assigiinngitsunik misissuinerup, misissueqqissaartoqartariaqarnera paasinarsitimmagu tamatumunnga patsisaavoq, Kommune Qeqertalimmi borgmesteri Ane Hansen oqarpoq.

- Kangaatsiami siorna ukiup naajartulernerani iluarsaassinitsinni akuersaaruminaattunik naammattuugaqarsimavugut, tassalu meeqqat pillugit saaffiginnissutaasartut suliarineqarneri naammanngitsut aamma suliarineqarsimanngitsutut isikkullit. Taava taakkua pillugit sulisut pingasut angerlartikkallarsimavagut misissuinitta nalaani sunniuteqannginnissaat pinerullugu, Kommune Qeqertalimmi borgmesteri Ane Hansen taama oqarpoq.

Suliat misissorluarneqarnissaat pillugu isumaginninnermi sulisut arlallit Qeqertarsuarmit Aasianniillu Kangaatsiamut suliartortinneqartut, Ane Hansenip ilanngullugu oqaatigaa, suliamullu atatillugu pinerluttuliortoqarsimanngitsoq erseqqissaatigalugu:

 - Pinerluttuliortoqarsimanngilaq. Meeqqanulli tunngasut misissoqqissaarumasimavagut. Meeqqanik sullissinermi inatsit atuuttoq siorna sukaterneqarami, tassalu meeqqat pillugit sumiginnaanermik nalunaarutiginnittoqaraangat, aammalu meeqqanik atornerluinermi tunngasuni taava kommuni pisussaaffeqarpoq akunnnerit 24-t iluanni sulianik aallaritsissalluni, tamannalu suliani arlalinni naammassineqarsimanngitsoq takusinnaagatsigu misissuerusussimavugut, Kommune Qeqertalimmi borgmesteri Ane Hansen taama oqarpoq.