AK: Kommune Qeqertallip ilaasortavut nikanarsarpai
Suliaq pineqartoq tassaavoq Kangaatsiami innuttaasunut sullissivimmi atorfillit pingasut januaarimi ukioq manna ulluni 14-ini angerlartinneqarallarnerannut tunngasoq.
Atorfillit pineqartut pingasut tamarmik Kangaatsiami inunnik isumaginninnermi allaffimmi atorfeqartuupput.
- Kangaatsiami siorna ukiup naajartulernerani iluarsaassinitsinni akuersaaruminaatsunik naammattuugaqarsimavugut, tassalu meeqqat pillugit saaffiginnissutaasartut suliarineqarneri naammanngitsut aamma suliarineqarsimanngitsutut isikkullit. Taava taakkua pillugit sulisut pingasut angerlartikkallarsimavagut misissuinitta nalaani sunniuteqannginnissaat pinerullugu, Kommune Qeqertalimmi borgmesteri Ane Hansen taamani KNR-imut taama oqarpoq.
AAMMA ATUARUK Kangaatsiami sulisut arlallit Kommune Qeqertalimmit suliunnaarallartinneqarput
Kommune Qeqertalik atorfilinnik pineqartunik suliunnaarallartitsinerminut atatillugu tusagassiuutinut aamma nalunaaruteqarpoq.
Kisianni suliunnaarallartinneqartuni pingasuusuni kommune marlunnut soraarnermi immikkut ajunngittorsiassanik kingusinnerusukkut tunniussaqartariaqarsimavoq.
- Tassa imaappoq kommunip tungaaninngaannit eqqunngitsumik pineqarsimasutut nalilersuutigisinnaavarput taanna, Dina Olsen, Atorfillit Kattuffianni siulittaasoq taama oqarpoq.
Nikanarsaarisimasutut suliassanngortitsinissaq isumaliutigineqartoq
Kommunili Kangaatsiami inunnik isumaginnittoqarfimmi atorfilittanik pingasunik suliunnnaarallartitsinermini kisimi tusagassiuutinut nalunaaruteqanngilaq.
- Innuttaasunik ataatsimiisitsisoqarsimavoq taavalu tusagassiuutinut nalunaarutigalugit uku sulisut pineqartut pillugit. Naluneqanngillat kikkuusut illoqarfik taama mikitigisoq, Dina Olsen oqarpoq.
Taamaattumik Atorfillit Kattuffiannit pineqartunik nikanarsaasoqarsimasutut suliassanngortitsisoqassanersoq maanna isumaliutigineqarpoq.
AAMMA ATUARUK Meeqqat pillugit sullissinermi akuersaaruminaattunik naammattuugaqarsimavugut
- Kusanaatsorujussuuvoq. Nikanarsagaapput taakkua pineqartut pingasut taamatut kommunip iliorneratigut. Taanna eqqarsaatigivarput maanna saaffiginnissutigissanerlugu arlaatigut kinguneqartinnissaa pillugu, Dina Olsen oqarpoq.
Dina Olsenip ilanngullugu ilisimatitsissutigivaa suliunnaarallartut pingajuata suliassartaa suli naammassineqanngitsoq. Taanna eqqartuussivimmit aalajangiiffigineqassaaq Atorfillit Kattuffiat Kommune Qeqertalillu suliami isumaqatigiinngissuteqarmata.
KNR-imit Kommune Qeqertalimmit oqaaseqartitsisinnaasimanngilagut.
