Kangaatsiami sulisut arlallit Kommune Qeqertalimmit suliunnaarallartinneqarput
Kommune Qeqertalimmi pissutsit assigiinngitsut misissorneqarneranni, sulisut arlallit Kangaatsiami suliunnaarallartinneqartut, Kommune Qeqertallip tusagassiutinut nalunaarummi allaaseraa.
Allattoq Mads Lynge
januaarip 28-at 2019 16:09
Kommune Qeqertalik Kangaatsiami sulisunik arlalinnik ulluni 14-ini suliunnaarsitsigallarpoq. Kommune Qeqertalik tusagassiutinut taama nalunaaruteqarpoq.
Ukiup 2018-ip naajartornerani sammisanik assigiinngitsunik misissuinerup, misissueqqissaartoqartariaqarnera paasinarsitimmagu tamatumunnga patsisaavoq, Kommune Qeqertalimmi borgmesteri Ane Hansen oqarpoq.
- Sukkasuumik sunniuteqarluartumillu misissuileruttorumalluta, aammalu pissutsit sukkanerpaamik pisarnermisut ingerlaleqqissinnaanissaat angulertorumallugu, sulisunik Aasianniit Qeqertarsuarmiillu Kangaatsialiartitsisimavugut, Kommune Qeqertalik tusagassiutinut nalunaarummi taama ilaatigut allaaserisaqarpoq.
Borgmesteri Ane Hansen KNR-imit oqaaseqartinniaraluaratsigu iluatsinngilarput.
