Kommunit unammillilernissaat ernumatigineqartoq

Kommunit akornanni ajunngitsorsiassat pillugit unammilleqatigiittoqarsinnaanera ernumanartoqartoq, SIK-p siulittaasua, Jess G. Berthelsen oqarpoq. SIK-p siulittaasua taama qisuariaateqarpoq, Kommuneqarfik Sermersooq isumagininnermi suliaqartunut ajunngitsorsiassanik neqerooruteqartalernissamik aaqqiissuteqartussanngortorlu.

- Ernummatigaara isumaqatigiissutit aqussinnaajunnaassagatsigit. Taamatut kattuffiit peqataatinneqanngippata taava aqunneqarsinnaajunnaassapput. Kommuneqarfik Sermersooq neqerooruteqarpoq, taava soorunami kommunerujussuat allat sulisussanik pissarsiniarlutik annerusumik neqerooruteqartariaqalissapput, Jess G. Berthelsen taama oqarpoq.

Kommuneqarfik Sermersooq Paamiuni Tasiilami Ittoqqortoormiinilu isumagininnermut suliaqartunut sulilersussanik atorfeqareersunullu assersuutigalugu ukiumut ataasiarluni angalasalernissamut Nuummut paasisassarsiortarlissamut ilaatigut neqeroorteqarusuppoq.

- Naatsorsuutigilluinnarparput sulisussaqarniarnermi iluaqutaalluinnassasoq, sulisooreersut sivisunerusumik attassinnaanissaannut aamma siunertaqarpugut, Kommuneqarfik Sermersuumi borgmesteri oqarpoq.

Eqqarsarnartoq

Aningaasarsiassat pillugit qitiusumik isumaqatiginniartoqartarmat, Kommuneqarfik Sermersuup kattuffiit avaqqutiinnarlugit ajunngitsorsiassaqartitsinissamut aalajangernera, SIK-p eqqarsarnartoqartippaa

- Taamaattumik pissusissamisoorpoq, taamatut iliorniaraanni kattuffiit peqatigalugit aaqqissuussinissaq, SIK-p siulittaasua oqarpoq.

Nuna tamakkerlugu attuuttussanik aaqqissuteqarnissaq pisariaqartoq, SIK-p siulittaasua Jess G. Berthelsen, Atorfillit Kattuffiatuulli, AK-tut, isumaqarpoq.

- Kattuffiit ilaasortallu eqqorneqartussat peqatigalugit nuna tamakkerlugu isumaqarpunga aaqqiissuteqartoqartariaqartoq, Kommuneqarfik Sermersuumi kisimi atuuttussaanngitsumik nunali tamakkerlugu atuuttussamik, SIK-p siulittaasua Jess G. Berthelsen oqarpoq.